Акмал Шораҳмедов: Менсиз АГМК кучсизланиб қолмайди, футболдан кетиш олдидан "Нефтчи"ни Суперлигага олиб чиқамиз

Тажрибали ҳимоячи Акмал Шораҳмедовнинг “Нефтчи” клуби билан шартнома имзолагани муҳим янгиликлардан бири бўлди.

Суперлигада кўзга кўринган ва ўз ўрнига эга бўлган ҳимоячининг про-лигага йўл олгани кўпчилик учун кутилмаган хабар бўлди. Лекин Шораҳмедов ўз қарорини эълон қилиб бўлди.

Албатта, ушбу футболчи орқали “Нефтчи”нинг янада кучайишга эришиши табиий. Футболчи эса sports.uz мухбирига нима учун бундай қарорга келгани ҳақида гапирди.

“Нефтчи”га ўтишининг сабаблари

- Ўтган йили Ўзбекистон кубоги финалида “Пахтакор”га қарши учрашувда жиддийроқ жароҳат олгандим. Гапнинг очиғини айтаман, ўшанда футбол ўйнай олмайманми, деб ўзим ҳам қўрқдим. Ўша пайтда жароҳатда юрган бўлишимга қарамасдан, Илҳом Мўминжонов мени “Нефтчи”га чақиришни бошлади. Ҳаётда ҳам Илҳом Мўминжонов ва Анвар Солиев билан муносабатларимиз яхши. Улар жамоамизга ёрдам беришимни илтимос қилишди. Рости, АГМК клуби жароҳатланган пайтимда аҳволим билан қизиқмади. Шунинг учун хафа бўлдим. Ўзим жароҳатимни даволатиш учун муолажа қилиб юрдим. “Нефтчи” эса клубга ўтмасанг ҳам майли, аммо жароҳатингни даволатиш керак, деб сербиялик мутахассисни менга алоҳида бириктиришди. Шундай қилиб, бу жамоа жароҳатимни даволатишимга ёрдам берди. Бундан ташқари, Суперлиганинг бир қанча клубларидан таклифлар бўлди. Лекин одамгарчилик юзасидан ва “Нефтчи” мураббийларига бўлган ҳурматим сабабли, фарғоналикларга ёрдам беришни маъқул кўрдим. Ҳозир шундай ёшдаманки, терма жамоада тўп суришга интилиб, юқорига кўтариладиган даражада эмасман. Лекин савиям олдин қандай бўлса, шундайлигича қолади. Энди бундан буёғига юқорига қараб ўса олмайман. Гарчи ёшим улғайиб бораётган бўлса ҳам, жисмоний ҳолатим яхши. Бундан яхшироғи бўлмайди.”Нефтчи”га ёрдам бера олишимга кўзим етди. Клубда пулни олиб, ўйнамасдан бепарволик қила олмайман. Мураббийнинг талабчанлиги ҳам кучли. Юрий Саркисян ишлаётган пайтда ҳам “Нефтчи”ни ҳурмат қилардим. Футболдан кетиш олдидан “Нефтчи”ни Суперлигага олиб чиқишни мақсад қилганмиз. Мўминжонов ва сербиялик мутахассисдан ҳам мураббийлик тажрибаларини ўрганаман.

Про-лига – бу унинг учун орқага ташланган қадамми?

- Бу орқага қайтиш. Тўғри, ҳозирда Суперлигада тўп суриш билан про-лигани ўртасида фарқи бор. Лекин менга манзур бўлган ҳамда менга ишонч билдираётган инсонлар билан бирга ишлагим келяпти. Суперлига – бу воз кечиши қийин бўлган Англия чемпионати эмас. Менимча, про-лигадаги 5-6 та жамоа Суперлиганинг 6-ўрнидан паст бўлган клубларни мағлуб эта олади.

АГМКдаги фаолияти тўғрисида

- АГМК жамоасига раҳмат айтмоқчиман. Икки йил давомида ушбу клубда тўп сурдим. Шу боис раҳбарлар, Миржалол Қосимов, мураббийлар штаби, жамоа аъзолари, клуб ходимларига миннатдорчилик билдираман. Осиё Чемпионлар лигаси саралаш баҳсларида иштирок этишида озгина бўлса ҳам ҳиссамни қўша олдим. Бу ҳаёт. Мен кетганим билан АГМК кучсизланиб қолмайди. У ерда яхши футболчилар кўп. Жамоага омад тилаб қоламан. Мен учун эса биринчи ўринда муносабат туради. Буни кўпчилик билади. Ҳеч қачон пул учун талашмаганман. Гарчи ёшим катта бўлса-да, жисмоний ҳолатим жойида. Фарғонада мухлислар билан тўла стадионда тўп суриб роҳатланмоқчиман. Тўғриси, водийда футбол ўйнаш мен учун ёқимли.

Суперлига йўлидаги кураш ҳақида

- Футболда ном муҳим роль ўйнамайди. Суперлигага чиқиш қийин бўлади. Буни барчамиз яхши тушунган ҳолда ўта жиддий тайёргарлик олиб боряпмиз. Фарғонага Суперлига қайтса, яна кўплаб ёшлар ўзини кўрсатиши мумкин бўлади. Лекин кубок баҳсларида Суперлига клубларини мағлуб этишимизга ишонаман. Боя айтганимдек, мени Суперлига клублари чақирди. Аммо Мўминжонов ва Солиевга сўз бергандим. Тўғриси, “Нефтчи”ни Суперлигага чиқади, деб ўйлагандим. Шунинг учун ҳам бу ерда тўп суришга рози бўлгандим. Лекин энди кўпроқ ишлашимиз керак, клубни олиб чиқиш учун. Шунингдек, кубок мусобақасида муносиб қатнашмоқчимиз. Про-лига баҳсларини “ФутболТВ”да жонли эфирда кўрсатишяпти. Хайрулла Ҳамидов айтганидек, бу йил про-лига янада қизиқроқ ўтади.