Александр Стоймирович: "Маматказинни яхши ўргангандик, бироқ..."

“Локомотив” – “Андижон” (1:2) ўртасидаги беллашувдан кейин мезбонлар мураббийи Александр Стоймирович фикрлари билан ўртоқлашди.

- “Андижон”ни ғалаба билан табриклайман. Икки йилдан бери битта жамоада тўп сураётган футболчилар бор. Бу ҳужумкор руҳда ўйнайдиган жамоа. Афсуски, бугунги ўйинда бизга омад кулиб боқмади. Охирги 20 дақиқада бизга омад келмади. Иккита хато ва иккита гол ўтказдик. “Металлург” билан ўйинда юз берган ҳолат “Андижон”га қарши учрашувда ҳам юз берди. Стандартлардан гол уриш – бу “Андижон”нинг асосий устун томонларидан бири ҳисобланади. Нотўғри ҳаракатларимиз туфайли голлар ўтказдик. Иккинчи голни тушунарсиз ҳолатда олиб чиқдик. Нима дейишим мумкин? Футболчиларим бир-бири билан тушунмайдими? Билмадим. Бир қатор вазиятларни юзага келтирган бўлсак-да, фақатгина битта гол урдик, холос. Олдинга интиламиз. Кейинги баҳсларда яхши натижаларга эришишга ҳаракат қиламиз. Аламли мағлубиятга учрадик. Футболга қарашларимиз ва руҳиятимизни ўзгартиришимиз керак. Шунда кўзлаган мақсадга эришишимиз мумкин. 5-турга келиб камчиликларимиз борлигини ҳам кўриш мумкин. Руҳий томондан ўзимизни ўнглашимиз, яхшироқ тайёрланишимиз кераклиги кўриняпти. Янги жамоа, 16 нафар янги футболчи келган. Фақат олдинга интиламиз.

- 80-дақиқадан кейин жамоангиздан тажовузкор ўйин кўрдик. Нима учун шуни ўйин бошидан кўрмадик? Масалан, “Пахтакор” билан бошқача бўлганди.

- Ҳар бир жамоанинг имкониятига қараб, мураббийлар ўйин тактикасини танлайди. Албатта, ҳужумкор руҳда ўйнайдиган клубларга қарши жамоани тайёрлаш қийин. Бугунги ўйинда ҳам ҳужумни яхши кўрадиган клубга қарши ўйнадик ва бу анча қийин бўлди, биз учун. Бизда топ-даражадаги футболчиларимиз йўқ. Бу футбол ва унда ҳамма нарса бўлиши мумкин. Ғалабалар учун ҳаракат қиламиз. “Навбаҳор”га қарши яхши натижага эришиш учун янада жиддий тайёрланамиз.

- Учрашувдан аввал “Андижон”ни қанчалик ўргангандингиз?

- Жамоамизга биринчи голни ургунича биз барчасини тўғри назорат қилаётгандик. Рақибнинг имкониятини тўғри баҳолаётгандик. Рақибни яхши ўргангандик. Иккинчи тўпни кутилмаганда ўтказиб юбордик. Ислом Маматказинни яхши ўргангандик. Уни қандай гол уришини билардик. Бироқ ҳимоячиларимизнинг хатолари туфайли гол ўтказдик ва у гол урди. Ўша ҳолатда рақиб футболчиси яхши ҳаракат қилди. Барчаси улар учун омадли кечди. Яхши ўйин бўлди. Футболда ҳамма нарса бўлиши мумкин. Барчасига тайёр туриш керак

- Иккита қанот ҳимоячилари ҳақида нима дейсиз? Улар хатоларга йўл қўйишди. “Андижон”нинг қанот ярим ҳимоячилари тезкор ҳаракат қилишди...

- Бошқача режа билан ўйинни бошлагандик. Рақиб жамоа сафида ҳам бир қатор кучли футболчилар бор эди. Улар қанотларда яхши ўйин кўрсатишди. Масалан, “Қизилқум” билан ўйнаганимизда уларнинг грузиялик футболчиси Шулая яхши таассурот қолдирганди. Бу ўйинда Бектемир Абдуманнонов бизни қийин вазиятларга солиб қўйди. Футболчи ўйиндан аввалги, тайёргарлик жараёнида руҳиятни ўзгартира олиши керак. Қаттиқ курашиш лозим. Бизга кўплаб янги ўйинчилар келган, жамоани шакллантириш устида ишлаяпмиз. Охирги 20 дақиқадаги ўйин учун йигитларга раҳмат айтаман. Доим мана шундай ўйнаш керак. Афсуски, бундай бўлмаяпти.

- “Андижон”нинг қайси футболчиси сизга маъқул келди?

- Тўғрисини айтсам, рақиб таркибида бир қанча сифатли ўйинчилар бор экан. Лекин мен фақат ўз жамоам ҳақида гапира оламан. Бизда ҳам бир қанча яхши футболчилар мавжуд.