Александр Волкановски: "Арман Царукянни жуда қийин жанг кутиб турибди"

Ярим енгил вазн тоифасида амалдаги UFC чемпиони Александр Волкановски таниқли ММА устаси Арман Царукян ва Бразилия вакили Маурисио Руффи тўқнашуви учун ўз прогнозларини билдирди.

"Менимча, Арман учун Руффини партерга йиқитиб, назорат қилиш осон кечмайди. Царукян одатда рақибининг бир оёғидан ушлаб олиб, курашга ўтади, лекин Маурисиога нисбатан бу усулни қўллаш анча қийин бўлади. Шу боис айнан ўша лаҳзада у ўзини ноқулай ҳис қилиб, безовта бўлиши мумкин. Агар Царукян курашини ўтказа олмаса, жиддий хавфга дуч келади. Чунки Руффининг қарши ҳужумдан келган биргина зарбаси жангни муддатидан олдин якунлаб қўйиши мумкин", — дея таъкидлади Волкановски X ижтимоий тармоғида.

Эслатиб ўтамиз, Арман Царукян ва Маурисио Руффи ўртасидаги баҳс 19 сентябрь куни АҚШнинг Лос-Анжелес шаҳрида, "UFC 331" турнирида ўтказилади.