Алишер Одилов нега “Навбаҳор”ни тарк этганини очиқлади

"Нефтчи" клуби сафида Суперлиганинг олтин медалини қўлга киритган Алишер Одилов Sports.uz сайтига берган интервьюсида нега мавсум ўртасида “Навбаҳор”ни тарк этганини баён қилди.

“Навбаҳор”да яхши мавсум ўтказаётган эдим. Аммо мураббий Сергей Лушчан билан муносабатларимиз ўзгариб кетди. Эътибор берган бўлсангиз, мени кўпинча захирага олишни бошлади. Шунда тушундимки, Лушчан менга ишонч билдирмаётгандек туюлди. Охирги ўйиним "Пахтакор"га қарши бўлган. Унда биз яхши ҳаракат қилган ҳолда мағлуб бўлгандик. Аммо мураббий мағлубият сабаби сифатида мени ва Руслан Жияновни кўрсатди. Аслида ўша учрашувда иккимиз ҳам жуда яхши ўйнаган эдик.

Орада 3–4 кун танаффус бўлди. Шу вақтда Бразилиядан жамоага легионер келаётганини эшитдим. Кейин эса Алишер Одиловга таклиф бўлса, бемалол тарк этиши мумкинлиги ҳақида гап қулоғимга чалинди. Мураббий шундай деганидан кейин ҳар қандай футболчининг ҳам ўйнагиси келмайди. Шунинг учун кетишга қарор қилдим”, — деди Одилов.