Алонсо бразилияликларни йўқотади. “Реал” Винисиус ва Родригони сотишга тайёр

“Реал”нинг янги бош мураббийи Хаби Алонсо ўзи бошқараётган лойиҳанинг муваффақиятини таъминлаш учун таркибда кутилмаган ва жиддий ўзгаришларни амалга оширишга тайёргарлик кўрмоқда.

Испаниянинг нуфузли манбаси – fichajes.net сайтининг ёзишича, “Қироллик клуби” бразилиялик легионерлар – Винисиус Жуниор ва Родригони сотиб юбориш вариантини ўрганиб чиқишга киришди.

Клуб хўжайини Флорентино Перес ҳужум чизиғини қайта ташкил қилиш режаси асосида ҳар икки легионерни сотиб юбориладиган футболчилар рўйхатига киритди. Манбага кўра, клуб бу ўйинчилар трансферидан умумий ҳисобда 350 миллион евродан ортиқроқ маблағ ишлаб олишни кўзлаяпти.

Мадридликлар бу икки трансфердан тушган суммани ҳужум чизиғини янгилашга йўналтиради. Флорентино Перес анчадан бери ўз жамоасининг олдинги чизиғида Килиан Мбаппе ва Эрлинг Холанд тандеми ўйнашини орзу қилиб келади. Экспертларнинг таъкидлашича, “Қироллик клуби” ёзда норвегиялик тўпурарни “Манчестер Сити”дан олишга ҳаракат қилиб кўриш эҳтимоли ошиб бормоқда.