Алонсо “Реал” футболчиларини шокка тушириб кетди

Мадриднинг “Реал” клуби раҳбарияти жамоа ўтган ёз бош мураббий этиб тайинланган испаниялик мутахассис Хаби Алонсони 12 январь куни ишдан бўшатиб юборди.

Бу воқеа жамоа футболчиларининг бир қисмини қаттиқ ҳайратга туширди. Marca нашрининг ёзишича, ҳеч ким мавсумнинг шу босқичида, айниқса Суперкубок финалида “Барселона”га 2:3 ҳисобида мағлуб бўлганидан кейин жамоада осойишта муҳит ҳукм сураётган пайтда бундай қарор қабул қилинишини кутмаган.

Маълум қилинишича, финалдан кейин футболчилар мураббийнинг қолиши табиий деб ҳисоблашган. Раҳбарият томонидан уни алмаштириш ҳақида ҳеч қандай сабаб ёки ишора бўлмаган. Аксинча, жамоа лойиҳа давом этаётганини ва Хаби Алонсо тўлиқ қўллаб-қувватланаётганини тушуниб турган. Бу ҳолат соврин топшириш маросимида президент билан мураббийнинг қучоқлашиши орқали ҳам тасдиқланган.

Шу сабабли унинг кетиши жамоа учун ҳақиқий шок бўлди. Айрим футболчилар шахсан тан олишича, улар бу ўзгариш ҳақида клубнинг расмий баёнотидан билишган ва бу олдиндан огоҳлантириш бўлмагани уларнинг ҳайратини янада оширган. Манба маълумотларига кўра, сўнгги ҳафталарда мураббий билан жамоа ўртасидаги муносабатлар аксинча яхшиланиб бораётган эди.