Аморим: "Мақсадимиз аниқ – АПЛда чемпионликни қўлга киритиш"

“Манчестер Юнайтед” бош мураббийи Рубен Аморим Англия кубогида “Фулхэм”дан учралган аламли мағлубиятдан сўнг жамоанинг асосий мақсади ҳақида ўз фикрлари билан ўртоқлашди. 
 
"Мақсад – Англия Премьер-лигаси чемпионлигини қўлга киритиш. Биламан, биз сўнгги ўйинларда ютқазяпмиз. Бироқ, мақсадимиз ҳали ҳамон ўзгармаган - яна бош совринни бошимиз узра кўтаришдир. 
 
Бу қанча вақт олишини билмайман. Бизда аниқ мақсад бор ва ҳар қандай ҳолатда ҳам олдинга ҳаракат қиламиз. Бу қачон рўй беришини билиш имконсиз, лекин футболчилар тобора яхшиланаётганини ва лигани тушуниб бораётганимизни кўряпмиз. Келажакда нима бўлишини кўрамиз" – деди португалиялик мутахассис "BBC Sport" нашрига берган интервьюси давомида. 
 
Маълумот ўрнида, Рубен бошчилигидаги “қизил иблислар” кеча пенальтилар сериясида “Фулхэм”га мағлуб бўлиб, турнирни тарк этишга мажбур бўлди. АПЛда эса 27 беллашувда иштирок этиб, 33 очко тўплаган ҳолда, турнир жадвалининг 14-ўринида келмоқда.