Аморим ўзбошимча футболчини қандай жазолаганини айтди

Англия Премьер-лигасининг  27-турида "Ипсвич"га қарши баҳсда "Манчестер Юнайтед" вингери Алехандро Гарначо биринчи бўлим охиридаёқ захирага олинди. Аргентиналик футболчи майдонни эрта тарк этишига Патрик Доргунинг қизил карточка олиши сабаб бўлди. Гарначо мураббийнинг қарорига норозилик билдириб, кийим алмаштириш хонасига йўл олди.

"Қизил иблислар" бош мураббийи Рубен Аморим футболчига қандай чора кўрилишини маълум қилди:

"Мен кичик текширув ўтказдим. Гарначо кийим алмаштириш хонасига йўл олди, чунки унинг формаси ҳўл бўлиб қолганди. У ўйинни томоша қилган, лекин захира ўриндиғида бўлмаган. Мен унга катта клубда ўйинчиларнинг ҳаракатлари қандай қабул қилинишининг муҳимлигини тушунтирдим. У бутун жамоага кечки овқат олиб бериш билан жазоланади" - деди португалиялик мутахассис матбуот анжуманида.

Ҳозирда МЮ АПЛ турнир жадвалида 33 очко жамғариб, 14-ўринни эгаллаб турибди.