Ана холос: Аргентина жаҳон чемпионатидан четлатилиши мумкин

Амалдаги жаҳон чемпиони Аргентина терма жамоаси мамлакат футбол ассоциациясидаги (AFA) коррупция жанжали фонида 2026 йилги жаҳон чемпионати иштирокчилари сафидан чиқарилиши мумкин.

Бу ҳақда La Nacion нашри хабар бермоқда.

Манбага кўра, AFA раҳбарияти вакиллари – ташкилот раҳбари Клаудио Тапия, унинг ишончли вакили Пабло Товигиньо ҳамда молия департаменти раҳбарининг ўринбосари Лусиано Накис коррупцион ҳолатлар бўйича гумон остига олинмоқда.

Суд Пилар шаҳрида жойлашган 10 гектарлик қўрғон (мулк)га, ундаги вертолёт майдони, от етиштириш фермер хўжалиги ва 50 дан ортиқ ретроавтомобилларга ким эгалик қилишини аниқламоқда.

Қайд этилишича, агар тергов якунларига кўра суд иши очилса ва давлатнинг футбол федерацияси фаолиятига аралашуви аниқланса, Халқаро футбол федерацияси (ФИФА) Аргентина терма жамоасини 2026 йилнинг ёзида бўладиган жаҳон чемпионатидан  четлатиши мумкин.

Бундан аввал, полиция AFA биносида ҳамда мамлакатдаги 13 та футбол клубида ноқонуний молиявий операцияларда, хусусан, пул ювишда иштирок этганлик гумони билан тинтув ишларини ўтказган эди. Тергов Sur Finanzas компанияси билан боғлиқ бўлиб, ушбу компания AFA президенти Тапиянинг яқин дўсти Ариэль Вальехога тегишли ва футбол клубларига ҳомийлик қилган.

Терговчиларнинг фикрича, Sur Finanzas клубларга қарз маблағлари бериб, тўловларни телевизион ёки маркетинг ҳуқуқлари орқали олиб турган бўлиши мумкин.