Ана холос! “Арсенал”яна саккиз футболчини трансферга қўяди

“Арсенал” раҳбарияти бош мураббий Микель Артета бошчилигида жамоа таркибини қайта шакллантиришга қарор қилди. Ҳозирги таркиб премьер-лигадаги рақобатга дош бера олмаяпти.

Қишки трансферлар вақтида “канонирлар” жамоага керак бўлмай қолган юлдузлар – плеймейкер Месут Ўзил, ҳимоячилардан Шкодран Мустафи ва Сократисдан қутилди. Энди тозалаш ишлари ёзда ҳам давом эттирилади.

Маълумотларга қараганда, Микель Артета клуб раҳбариятига жамоага фойдаси тегмаётган яна саккиз нафар футболчи рўйхатини берган. Унга кўра, испаниялик мураббийга ҳозир ижарада ўйнаётган Жо Уиллок, Матео Гендузи, Лукас Торрейра ва  Эйнсли Мэйтленд-Наилз керак эмас. Шунингдек, Александр Ляказетт, Эдди Нкетиа, Рисс Нельсон ва Давид Луиз ҳам ёзда Лондон клубини тарк этиши керак.

“Арсенал” бу футболчилар трансферидан келадиган ва маошидан тежаладиган маблағларни янги ўйинчиларни олишга йўналтиради.