Ана холос: “Манчестер Сити” Гвардиоланинг ўрнига бошқа мураббий топди

“Манчестер Сити” жорий мавсумда Англия кубогидан бошқа совринга даъвогарлик қилолмайди. Миллий чемпионатдаги натижалар ҳам клуб хўжайинларини қониқтирмаяпти.

E-notiсies нашрининг маълум қилишича, “шаҳарликлар” испаниялик мутахассисдан воз кечишга тайёр. Клуб мутасаддилари Пепнинг ўрнини эгаллаши мумкин бўлган янги мураббий топиб қўйди.

Манбага кўра, “Манчестер Сити” айни пайтда Италия чемпионатида “Комо”ни бошқараётган Сеск Фабрегасни бош мураббийликка таклиф қилмоқчи.

Раҳбарият яқинда мураббийлик фаолиятини бошлаган Фабрегасни ёзда олиб келиш учун бор имкониятини ишга солади.

Фабрегас Англия Премьер-лигасини яхши билади. У футболчилик даврида “Арсенал” ва “Челси” каби АПЛнинг қудратли клубларида тўп тепган. Бундан ташқари, “Барселона”, “Монако” ва “Комо”да ҳам ўйнаган.