Ana xolos! Messining haykali Madridda qad rostlaydi

Ispaniya qirollik futbol federatsiyasi “Barselona” klubi forvardi Lionel Messining erishgan yutuqlarini abadiylashtirish maqsadida unga haykal o‘rnatmoqchi.

Mundo Deportivo nashri tarqatgan xabarga ko‘ra 32 yoshli argentinalik futbolchining haykali Madrid provintsiyasida joylashgan Las-Rosas shahrida qad rostlaydi.

Qayd etish lozimki, Messining haykali Alfredo Di Stefano, Pele va Diego Maradona kabi futbol afsonalarining haykallari qatoriga joylashtiriladi. Biroq, bu haykal Messi faoliyatini yakunlaganidan so‘ng o‘rnatiladimi yoki undan oldinmi, bu hozircha aniq emas.

Eslatib o‘tamiz, Messi yaqinda faoliyatidagi oltinchi “Oltin to‘p”ni qo‘lga kiritdi va bu borada mutlaq jahon rekordchisiga aylandi.