Ana xolos! O‘FA hakamlar "Paxtakor" zarariga penalti belgilaganini e’lon qildi (video)

O‘zbekiston Superligasi 9-turidan o‘rin olgan "Qo‘qon-1912" - "Paxtakor" uchrashuvida tomonlar 1:1 hisobida durang o‘ynadi.

E’tiborlisi, bosh hakam toshkentliklar darvozasiga 2 bor penalti belgiladi. O‘FA matbuot xizmati bunga Hakamlar bo‘limi xulosalarini taqdim etdi:

"O‘zbekiston futbol hakamlari markazi va ekspertlar hay’ati mutaxassislari O‘zbekiston Superligasining 9-turidan o‘rin olgan “Qo‘qon-1912” — “Paxtakor” jamoalari o‘rtasidagi bahsda yuzaga kelgan vaziyatlar bo‘yicha o‘z xulosalarini berdi.

Xususan, uchrashuvning 1-daqiqasida mezbonlar hujumchisi raqib jarima maydonchasi ichida yiqildi. Bosh hakam bu vaziyatda 11 metrlik nuqtani ko‘rsatdi. Mutaxassislar fikriga ko‘ra, himoyachi tomonidan penalti beriladigan darajada qo‘pollik ishlatilmagan va hujumchi yiqilishni ko‘proq xohlagan. Mutaxassislar xulosasiga ko‘ra, penalti noto‘g‘ri belgilangan.

Shuningdek, o‘yinga qo‘shib berilgan daqiqalarda “Qo‘qon-1912” vakili toshkentliklar jarima maydonchasi ichida himoyachi tomonidan yiqitildi. Bosh hakam bu safar ham penalti belgiladi. Ushbu vaziyatda “Paxtakor” himoyachisi o‘ng oyoq tizza qismi bilan raqibining chap oyoq son qismiga kontakt hosil qilgan. Natijada, hujumchi muvozanatni yo‘qotdi. Mutaxassislar fikriga ko‘ra, hakam qarori to‘g‘ri bo‘ldi.

O‘zFHM shuni ma’lum qiladiki, uchrashuvdagi birinchi penalti mutaxassislar fikriga ko‘ra noto‘g‘ri belgilangani sababli bosh hakamga nisbatan past baho belgilanadi va o‘yin uchun gonoraridan tegishli tartibda ushlab qolinadi".