"Анча йиллардан бери "Қизилқум"га тайёр ўйинчилар чақирилган, ёш футболчиларга имконият берилмаган". Янги жамоа қураётган Асрор Алиқулов Суперлигада ўз сўзини айтадими?

Истеъдодли мутахассис Асрор Алиқулов “Шўртан”даги бир неча йиллик фаолиятидан кейин энди ўзи учун янги чақириқни қабул қилиш вақти етиб келганлигини ҳис қилди. Энди Суперлигада “Қизилқум” клубига устозлик қилади.

Ҳозирда Асрор Чориевич жиддий ишга киришиб кетган. Унинг Суперлигадаги дебют мавсуми қандай бўлиши ўзи учун ҳам жуда қизиқ. Алиқулов “Қизилқум” бош мураббийи сифатида Sports.uz сайтига интервью берди.

- Асрор Чориевич, янги мавсумда Суперлигада бош мураббийлик дебютингизни ўтказишингизни кутганмидингиз ёки бу таклиф сиз учун кутилмаган сюрприз бўлдими?

- Кутилмаган десам тўғри бўлар. Лекин “Қизилқум” қизиқаётганини эшитгандим. Сюрприз бўлди, деган сўзларга қўшилмайман. Мураббий ҳамма вақт ишга тайёр туриши керак. “Шўртан”да ишлаган фаолиятимдан сўнг “Қизилқум” қизиқиш билдираётганини эшитгач, хаёлан ўзингизни юқорироқ савияда синаб кўришни бошлайсиз. “Қизилқум” таклифини ортиқча ўйланишларсиз ва иккиланишларсиз қабул қилдим. Катта мақсадлар билан иш бошладик. Клубни футболчилар бирданига тарк этди ва яна янги жамоа тузишимизга тўғри келди. Фикру-ҳаёлим яхши жамоа тузиш ва уни шакллантиришга қаратилган.

- Суперлигада дебютант мураббий сифатида қандай бўларкин, ўз сўзимни айта оламанми, деган тушунча ҳам борми? Шунингдек, қандайдир босимни ҳис қилмаяпсизми?

- Босим йўқ. Албатта, сизга ишонч билдирган инсонларнинг ишончини оқлай оламанми, деган нарса барибир қийнайди. Клубда менга ишонч билдирган раҳбарларнинг ишончини оқлаш мен учун муҳим. “Шўртан”да ишлаган вақтимда ҳам про лига жамоасини шуғуллантиряпман, деган фикр бўлмаган. Фақат жамоани ва футболчиларни катта футболга тайёрлаяпман, деган маънода ишлардим. Ҳамма вақт ривожлантиришга, ўйинчиларни кучайтиришга ва жамоани шакллантиришга эътибор қилсангиз, сиз про лигада ишлайсизми ёки Суперлигадами, менимча бунинг орасидаги фарқ фақатгина футболчиларни ва рақибларни савиясида бўлиб қолади, холос. Суперлигадаги рақиблар про лигадагидек рақиблар эмас. Ҳаммаси кучли. Мураббийдан ҳам катта масъулият талаб қилади ва бўшашишга ҳеч қачон имкон бермайди. Ҳар бир очкога осонликча эришилмайди.

- Ўтган йили “Қизилқум”да тўп сурган номи чиққан, тажрибали ўйнчилар ёппасига клубдан кетишди. Юқорида айтиб ўтганингиздек, янги таркиб ва янги жамоа шакллантиряпсизлар. Айтайлик, жамоа ўтган мавсумдагидек 5-ўринни эгаллашга яна қодир бўладими ёки вазифа бошқа қўйиладими?

- Жамоани шакллантиряпмиз. Мақсадсиз футболнинг ўзи йўқ. Ҳамма вақт мақсад бўлади. Биринчи навбатда яхши жамоа тузиш орқали яхши футбол кўрсатиш керак. Анча йиллардан бери “Қизилқум”га тайёр ўйинчилар чақирилган. Лекин ёш футболчиларга имконият берилмаган. Биз ана шундай иқтидорли ёшларга ҳам йўл очмоқчимиз. Бу ерда сифатли футбол ҳам кўрсатишимиз керак. Ҳар томонлама катта ҳажмдаги ишларни олиб боряпмиз. Буни қай даражада уддалаймиз ёки йўқ, буни чемпионат кўрсатади. Мухлислар доим яхши натижаларни кутишади. Ёшларни ортимиздан эргаштиришимиз керак ва уларга имконият беряпмиз.

- Албатта, бунга “Шўртан”даги ишингиз орқали гувоҳ бўлганмиз. Қўл остингиздан кўплаб иқтидорли ўйинчилар чиққан. Биргина ҳозир Эрон чемпионатида тўп сураётган Шерзод Темировни мисол келтирсак бўлади. Шунинг учун “Қизилқум”да ҳам энди кашфиёт ёшлар етишиб чиқишига ишонса бўлади. Шундай экан, бу айни пайтда сиз учун энг муҳимими? Биламизки, ҳар қандай мураббийга ҳам тажрибали футболчилар керак. Сиз учун тажрибали ижрочилар билан ишлаш қанчалик қизиқ?

- Кўп ёшлар билан ишлаганим учун тажрибали футболчилар билан ишлаш қанчалик эканлигини унчалик ҳис қилмаганман. Ёшлар билан ишлаш жуда қизиқ. Уларни қанчалик кучайтиряпсиз, қайси томонга ўзгартира оляпсиз, фойда беряптими-йўқми, мана шуларни кузатиш анча қизиқарли. Ёши катта футболчилар билан ишламаганим учун бу томонлама қизиқ ёки қизиқ эмас дея олмайман. Таркибимизда яхши савиядаги ўйинчилар ҳам бор. Улар кўрсатмангизни қисқа вақт ичида бажара оладилар. Ёшларга вақт керак. Бизда тажрибали ва иқтидорли ёшлар ҳам бор. Шунинг учун икки томонлама ҳам қизиқ. Ёшларнинг савиясини кўтаришга ҳаракат қиламиз.

- Жамоангизда легионерларни ҳам кўришимиз мумкинми?

- Легионерларимиз бор. 10 талик лимит бизни қийин аҳволга солиб қўйди. Буни яширишни кераги йўқ. Шунинг учун ўтган йилги легионерлардан Олег Толмасовни қайтардик. Станиславлевич бўйича гаплашяпмиз ва уни ҳам клубимизга қайтаряпмиз. Улар легионер бўлган тақдирда ҳам биз булар орқали лимитдаги ўрнимизни йўқотмаймиз. Янги легионерларни ҳам таклиф қилганмиз. Шартнома тузилгач, овоза қилсак тўғрироқ бўлади, деб ўйлайман. Иккитаси африкалик ва биттаси россиялик. Россиялик марказий ҳимоячи келган.

- “Қизилқум”да мураббийлар штаби қандай кўриниш олди?

- Ёрдамчиларим олдин “Қизилқум” жамоасида ишлаган мураббийлар. Акмал Холиқов, Обид Худоёров, дарвозабонлар мураббийи. Хуллас, олдинги штаб қолди.

- Клубда сиз учун ҳамма шароит борми?

- Ҳамма шароит бор, ишлар давом этяпти. Яна бир неча ҳафта вақтимиз қолди. Таркибни 100 фоиз йиға олганимиздан сўнг ўйиннимизни ҳам йўлга қўйишимиз керак. Ҳозир бор имкониятдан максимал фойдаланишга ҳаракат қиляпмиз. Ҳавонинг кескин совиб кетиши бизга ноқулайлик келтирса ҳам барибир машғулотларни узлуксиз олиб боряпмиз.

- Хориж йиғинига ҳам чиқасизларми?

- 3 февралдан 17 февралгача Туркиянинг Анталия шаҳрида шуғулланамиз. У ерда 4 та ўйин режалаштирганмиз. Украина, Руминия, Қозоғистон клублари билан ўйнашимиз мумкин.

Шуҳратбек Жўраев.