Анчелотти Неймарни жаҳон чемпионатига чақирмайди

Бразилия терма жамоаси бош мураббийи Карло Анчелотти катта эҳтимол билан 33 ёшли Неймарни 2026 йилги жаҳон чемпионатида қатнашадиган ўйинчилар рўйхатига киритмайди.

- Охирги пайтда Неймар билан мулоқот қилаётганим йўқ. Қачон тикланиши ва шундан кейин қандай ўйин намойиш қилишини кўришимиз керак.

Жаҳон чемпионати учун бизга жуда юқори даражадаги жисмоний тайёргарликка эга ўйинчилар керак. Мен битта ёки иккита учрашувда интенсивликни таъминлай олмаган футболчини майдонга туширишим мумкин. Аммо бутун жаҳон чемпионати давомида интенсив ҳаракатлана олмайдиганини терма жамоага олмайман.

Биз учун ҳар бир футболчи ўзининг энг юқори даражасида бўлиши жуда муҳим аҳамият касб этади, - деди Карло Анчелотти.

Неймар навбатдаги жароҳатидан кейин яна майдонга қайтди. “Форталеза” жамоасига қарши учрашувда тажрибали ҳужумчи атиги 24 дақиқа ўйнади.

Мутахассисларнинг таъкидлашича, Неймарнинг кейинги пайтдаги жисмоний ҳолати Карло Анчелоттини қониқтирмаяпти ва шу боис, машҳур юлдуз италиялик мутахассисдан таклиф олгани йўқ.