"Андижон" "Ал-Ҳилол" ва Неймар қила олмаган ишни уддалади ёхуд водий дербиси ҳақида

Суперлиганинг 19-турини безаб бериши тахмин қилинган водий дербиси – “Андижон” ҳамда “Навбаҳор” жамоалари ўртасидаги қарама-қаршилик кутилганидек ниҳоятда ҳиссиётларга, ҳужумларга ва албатта курашларга бой бўлди. “Бобур Арена” эса шу куни ўзгача муҳитда бўлди, ҳақиқий футбол муҳити ҳукмрон эди. Табиийки, Намангандан ҳам анчагина ишқибозлар жамоасини қўллаш учун стадионга етиб келдилар.

Беллашувдан аввал жамоаларнинг ўзаро ўйинлар статистикаси тақдим этилганидан хабарингиз бўлса керак. “Андижон” охирги бор ўз уйида 2016 йили ушбу рақибини мағлуб этганди. Қолаверса, наманганликлар жорий мавсумда июль ойидан бери ғалаба қозона олмаётганди. Бир сўз билан айтганда, водий дербиси ҳар томонлама катта қизиқишларга сабаб эди.

Ўйин меҳмонлар учун омадли, мезбонлар учун омадсиз бошлангани рост. Буни 2-дақиқадаёқ киритилган голдан билиш мумкин. “Навбаҳор” футболчиси Аброр Исмоилов жарима майдони ичида яратилган имкониятдан фойдаланиб қолди ва ҳисобни очди. Кўпчилик бунга мезбонлар қандай жавоб бераркин, дея кутишди. Мезбонлар эса иккинчи бўлимда вазиятни ўзгартира олди. Айнан танаффусдан сўнг ўйин сурати янада кўтарилди. Бунга “Бургутлар”нинг парвози ва голлари сабаб. 54-дақиқа ўтиб бораётганида чап қанотдан оширилган тўпни “Навбаҳор” жарима майдони ичида ҳаммадан баланд сакраган ҳимоячи Илҳом Алижонов боши билан чиройли тарзда гол уриб ҳисобни тенглаштирди. Бу унинг Суперлигадаги учинчи голи бўлди.

Майдонда эса чинакам кураш ва жанг кечди. Иккала жамоа аъзолари майдоннинг ҳар бир қарич ери учун курашдилар ва якунда “Андижон”нинг қўли баланд келди. Бош ҳакам беллашувга 9 дақиқа вақт қўшиб берди. 89-дақиқада бош мураббий Александр Хомяков захирадан Суҳроб Бердиев билан Сардор Абдунабиевни ўйинга қўшди. Айнан ушбу ўзгариш якунда самарасини берди. Мезбонларнинг навбатдаги хавфли ҳужумидан кейин жарима майдони ичида Бердиев акробатик тарзда Ўткир Юсупов дарвозасини ишғол этиб, “Бобур Арена”ни чинакамига ларзага келтирди. Бежизга ўйиндан кейинги матбуот анжуманида Хомяков Бердиевга охирги 8 дақиқанинг қаҳрамони дея таъриф бергани йўқ. Бу вазиятда мураббийнинг топқирлиги ҳам иш берди ва Суҳроб барча ишончларни оқлади. Умуман олганда, бу кеча “Андижон”нинг барча аъзолари олқишларга сазовор эди.

Ростини айтганда, учрашувдан олдин кўпчилик водий дербисида кучлар тенг келишини тахмин ҳам қилишганди. Лекин ўйин мобайнида ҳар икки жамоа ғалаба учун борини бериб ўйнади ва бунда “Андижон” ўз кучини ҳақли тарзда намойиш этиб, охирги дақиқаларда ғалабани илиб кетди. Хомяков жамоаси ўз иродасини кўрсатди.

Шу ўринда бош мураббий Александр Хомяковнинг ўйин учун тузган режаси ва стратегиясига алоҳида тўхталиш ўтсак ҳам арзийди. Чунки бу борада мураббий ақлли қарорлар қабул қилгани якунда ўз самарасини берди. Ҳа, Хомяков ва унинг жамоаси Суперлигадаги ёқимли саргузшатларини шу тариқа давом эттирмоқда. Андижон халқига эса хушкайфият улашмоқда. Бардавом бўлсин...

“Андижон” – “Навбаҳор” – 2:1 (0:1).

23 сентябрь. Андижон. “Бобур Арена” стадиони. 15231 томошабин.

Ҳакамлар: Абдурашид Худойберганов, Олим Абдувосилов, Ришат Нугмонов.

VAR: Аскер Нажафалиев

AVAR: Алишер Усмонов

Назоратчи: Бахтиёр Тоғаев

Комиссар: Шохруҳ Саид.

“Андижон”: Игорь Литовка, Илдар Маматказин, Владимир Бубанья, Абдувоҳид Ғуломов, Илҳом Алижонов (Абдураҳмон Комилов, 82), Леван Арвеладзе (Илҳом Абдуғаниев, 75), Фарҳод Бекмуротов (Суҳроб Бердиев, 89), Муҳаммадкарим Тоиров, Фарҳод Соҳибжонов (Сардор Абдунабиев, 89), Армин Бошняк, Рубин Хебай.

“Навбаҳор”: Ўткир Юсупов, Милош Милович, Филип Иванович, Шаҳбоз Жўрабеков, Игорь Голбан, Остон Ўрунов, Жамшид Искандеров (Жасур Яхшибоев, 65), Аброр Исмоилов, Дониёр Абдуманнопов (Асад Собижонов, 60), Жамшид Болтабоев, Тома Табатадзе.

Голлар: Аброр Исмоилов, 2 – 0:1. Илҳом Алижонов, 54 – 1:1.Суҳроб Бердиев, 90+4 – 2:1.

Огоҳлантиришлар: Абдувоҳид Ғуломов, 69 – Остон Ўрунов, 40. Тома Табатадзе, 90+6. Ўткир Юсупов, 90+9.

Шуҳратбек Жўраев.