"Андижон" бош мураббийи Отабек Ғуломхўжаев матбуот анжуманига нега келмади? Кубокдаги асосий вазифа нима эди? Ёрқин Назаров жавоб берди

Ўзбекистон Кубоги доирасида бўлиб “Турон” – “Андижон” (1:0) ўртасидаги учрашувдан кейинги матбуот анжуманида меҳмонлар мураббийи Ёрқин Назаров иштирок этди.

- “Турон” жамоасини кейинги босқичга чиққани билан табриклаймиз. Бевосита ўйинга келсак, учрашув тенг курашлар остида ўтди. Беллашув бошларида йигитларимиз ҳали ўйинга киришиб кетмаган пайтда рақиб гол уриб олди. Бизда ҳам, уларда ҳам хавфли вазиятлар кам бўлди. Балки ҳавонинг иссиқлиги футболчиларга таъсир кўрсатгандир.

- “Андижон” асосан стандарт вазиятлардан гол уряпти. Қачон ўйиндаги вазиятдан ҳам гол уради?

- Уради, Худо хоҳласа. Шунинг устида ишлаймиз. Биласизлар, жамоамиз ёш, аммо бу дегани гол ура олмаслигимиз керак, деган тушунчани англатмайди. Биз ҳужумни кучайтириш борасида ишлашни бошлаганмиз. Худо хоҳласа, кейинги учрашувларда ўйин пайтидан голлар урамиз ва “Андижон” жамоасининг ғалабалари ҳам бўлади.

- Дарвозабон Низом Зиёвутдинов ва Эдгар Бернхардт таркибда йўқлиги нима билан боғлиқ?

- Эдгар Бернхардт касал, оёғи жароҳатланган. Ҳар куни ўзи алоҳида шуғулланяпти. Низом Зиёвутдиновни АГМК жамоасига қайтариб бердик. У бизга ижара ҳисобида келганди.

- Жамоанинг учта ўйинда бир очкога эга бўлишининг асосий сабаби нима?

- “Арал” билан учрашувда ёшларимизни, захирадаги футболчиларимизни текшириб олдик. Бугунги ўйинга ютамиз деб келгандик, аммо ютқазиб қўйдик. Кубок баҳсларидаги асосий мақсадимиз ўйинчиларни текшириб олиш эди.

- Бош мураббий Отабек Ғуломхўжаев нега матбуот анжуманига келмади?

- Раҳбарлар билан гаплашиб қолди. Сизлар бу ерда кутиб ўтиравермайсизлар-ку.