"Андижон" ОЧЛ 2 даги юришини бошлайди. Илк рақиб енгилмас "Аркадаг"...

“Андижон” футбол клуби 17 сентябрь куни Осиё Чемпионлар лигаси 2 доирасида ўзининг илк беллашувини Туркманистонда “Аркадаг” клубига қарши ўтказишидан хабарингиз бор. Ҳозирда барча эътибор бўлажак беллашувга қаратилган.

“Андижон”нинг ОЧЛ 2 даги илк расмий рақибига айланган - “Аркадаг” клуби ҳақида тўхталадиган бўлсак, ушбу жамоа ташкил этилганига ҳали кўп бўлгани йўқ. 2023 йилнинг 1 январь куни мазкур жамоага асос солинди. Шунга қарамай, қисқа вақт ичида клуб Туркманистон чемпионатида янги лидер сифатида гавдалана бошлади.

“Аркадаг” “Чақириқ” Кубоги мусобақаси ғолиблигини қўлга киритган ҳолда ОЧЛ 2 га йўл олди. Ҳал қилувчи ўйинда “Аркадаг” Камбоджанинг “Свайриенг” жамоасини 2:1 ҳисобида мағлубиятга учратди. Маълумот учун, “Чақириқ” Кубоги ОЧЛ Элит ва ОЧЛ 2 мусобақасидан кейинги ўринда турувчи турнир саналади. “Аркадаг” худди “Андижон” сингари ОЧЛ 2 да дебют мавсумини бошлайди.

Туркманистон “Юқори” лигасида (бизнинг Суперлигамиз каби) 8 та жамоа иштирок этади. “Аркадаг” шу кунгача 20 та ўйин ўтказган бўлиб, барчасида 100 фоизли натижа кўрсатди, яъни, 20 та учрашувнинг барчасида ғалаба қозонди. 60 очко билан якка пешқадамлик қилаётган бу жамоа иккинчи ўриндаги “Алтин Аср”ни 27 очкога ортда қолдиряпти. Жамоа чемпионатда охирги ўйинини 11 сентябрь куни сафарда “Мерв” клубига қарши ўтказиб 1:3 ҳисобида ғалаба қозонди.

Туркманистон терма жамоасининг асосини “Аркадаг” клуби футболчилари ташкил қиладилар. Шунингдек, таркибида фақат маҳаллий футболчилар тўп суришмоқда, легионерлар хизматидан фойдаланишмайди.

“Аркадаг” янги ташкил этилганига қарамасдан умумий ҳисобда 4 та соврин қўлга киритишга улгурди. Жумладан, Туркманистон чемпионлиги ва мамлакат Кубоги соҳибига айланган.

Клуб уй ўйинларини Аркадаг шаҳридаги “Аркадаг” стадионида ўтказиб келмоқда. Ўз бағрига 10 минг томошабинни сиғдиради.  

Шунингдек, “Аркадаг” клуби мамлакат чемпионатида 2023 йилдан иштирок этишни бошлаган бўлса, ҳали шу кунга қадар мағлубиятга учрагани йўқ. Ўтган йили ҳам, ундан олдинги йили ҳам 100 фоизли натижа қайд этди. Фақат ОФК тасарруфидаги “Чақириқ Кубоги”да “Аркадаг” икки марта мағлубиятга учраган.

“Аркадаг” футболчиси Дидар Дурдиев 14 та билан чемпионатда тўпурар бўлиб турибди. Ундан кейин Бегенч Ахмаммедов 13 та гол ва Алтимурат Аннадурдиев 12 та билан бормоқда. Қизиғи, улар ҳам “Аркадаг” аъзолари. Мухлисларимизга таниш бўлган ва Ўзбекистон чемпионатида ўйнаган Арсланмурад Аманов “Аркадаг”да фаолият олиб боряпти.

“Андижон” жамоасига бўлажак тарихий учрашувда омад тилаймиз.