"Андижон"га келиб-кетаётган мураббийлар билан боғлиқ қизиқ ҳолат нима эканини биласизми?

Охирги пайтларда “Андижон” клубида қандай ўзгаришлар бўлаётганидан яхши хабардорсиз. Айниқса, жамоа бошқаруви тадбиркорнинг қўлига ўтганидан кейин анча-мунча ишлар бажарилди ва бу ҳолат давом этмоқда. Муҳими, жамоа номини юксалтириш йўлида катта ишлар режалаштирилган.

Кўрдингиз, ўтган йили “Андижон” катта қийинчилик билан Суперлигада жон сақлаб қолди. Бу йилдан эса мухлисларнинг умиди катта. Бироқ ҳозирча натижалар кутилган даражада эмас. Буни “Андижон”нинг турнир жадвалида эгаллаб турган ўрнидан билса ҳам бўлади. 6 та учрашувда 4 очко билан 12-ўринда. Куни кеча бош мураббий ҳам ўзгартирилганини яхши биласиз. Отабек Ғуломхўжаев эгаллаб турган вазифасидан озод этилди ва ўрнига ишини вақтинча Ёрқин Назаров бажариб туради. Бунгача ушбу мутахассис Ғуломхўжаевнинг штабида ишлаётганди. Эътиборингизни эса қизиқ бир жиҳатга қаратмоқчимиз.

Ўтган йилнинг август ойи охирларида клуб тепасига янги раҳбар келди. У пайтда жамоа бош мураббийи Виктор Кумиков эди. Бироқ россиялик мутахассис бошчилигида “Андижон” ҳали ғалаба нималигини билмай келаётганди. Шу сабабдан янги раҳбарият Кумиков билан дўстона равишда хайрлашди. Бош мураббийликка андижонлик собиқ футболчи Бахтиёр Ҳамидуллаев тайинланди. Шундай қилиб, “Андижон” иккинчи даврага ушбу мураббий бошчилигида тайёрланди. Жамоани қийин пайтда қабул қилиб олишдан қўрқмаган Ҳамидуллаев ихтиёридаги бор футболчилар билан ҳаракатни бошлади. Унинг Суперлигадаги дебют баҳси Андижонда “Локомотив”га қарши ўйин билан бошланган бўлиб, ўшанда 0:1 ҳисобидаги мағлубиятни қабул қилиб олганди. Умуман айтганда, “Андижон” устози иккинчи даврани иккита мағлубият билан бошлаганди. Кейин кетма-кет тўртта беллашувда мағлубиятсиз серия қайд этилди. Лекин “Батигол”нинг “Андижон”даги мураббийлик фаолияти узоққа чўзилмади. Унинг клубдаги бош мураббийлиги 14-турда 22-тургача давом этди. Шу вақт ичида “Андижон” бир ғалаба, тўрттадан дуранг ва мағлубият қайд этди. Термизда “Сурхон”га имконият бой берилгач, Ҳамидуллаевга чиқиш эшиклари кўрсатилди. Айтиш лозимки, андижонлик мутахассис матбуот анжуманларида ичидаги гапни бемалол, қўрқмасдан оммага айтадиганлар тоифасидан эди.

Мавсум тугашига тўртта тур қолганди. Вазият эса жиддий эди. Оғир аҳволга тушиб қолган жамоани қайси мураббий бошқаришга рози бўларкин, деган савол кўндаланг турарди. Клуб раҳбарияти Отабек Ғуломхўжаев орқали масалага ечим топдилар. Вазифа битта: “Андижон”ни Суперлигада сақлаб қолиш эди. Олдинда эса “Машъал”, АГМК, “Қўқон-1912” ва “Пахтакор”га қарши муҳим ўйинлар кутиб турганди. Ғуломхўжаевнинг “Андижон”даги илк ўйини омадли чиқиб, “Машъал” билан баҳсда 2:1 ҳисобида ғалаба қозондилар. Аммо қолган учта учрашувда рақибнинг кучлилиги барибир сезилди. Вазият шундай тус олдики, якунда “Машъал” билан баҳсдаги ғалаба туфайли “Андижон” Суперлигада қолиш учун плей-офф учрашувида иштирок этиш имкониятини қўлга киритди. Фарғонада “Нефтчи”га қарши ҳали қилувчи учрашувда андижонликлар 3:1 ҳисобида ғалаба қозонди ва Суперлигада қолди. Бу йилги мавсум учун режалар ва мақсадлар аниқ эди. Бош мураббий таркибни футболга қарашларидан келиб чиқиб, режаларига ва услубига мос тушадиган футболчилар ёрдамида тузди. Бироқ мавсум бошида унинг тўрт ойдан кейин жамоадан кетишини ҳеч ким кутмаганди. Лекин футболда доим натижа биринчи ўринда туради. Ҳозирча “Андижон” Ғуломхўжаев бошқарувида битта ғалабага эришди. Чемпионатинг иккинчи турида Андижондаги очилиш учрашувида уч очко қўлга киритилганди. Ундан олдин эса мавсумнинг дастлабки ўйинида “Қизилқум”га имконият бой берилганди. Кейинчалик “Бунёдкор” майдонида мағлуб бўлди. Ўз уйида “Машъал” билан дуранг ўйнагач, Бекободда “Металлург”га ютқазди. Кейин эса Ўзбекистон Кубоги гуруҳ баҳслари бўлиб ўтди. Афсуски, “Андижон” иккита мағлубият ва битта дуранг қайд этиб гуруҳда қолиб кетди. Бунинг натижасида клуб раҳбарияти томонидан Отабек Ғуломхўжаев ҳам истеъфога чиқарилди. Бу борада мураббий ҳамда клуб хўжайини sports.uz сайтига мазкур вазият бўйича атрофлича муносабат билдириб ўтишди.

Юқорида айтиб ўтганимиздек, Отабек Ғуломхўжаевдан кейин Ёрқин Назаров бош мураббийлик вазифасига киришди. Бироқ кеча “Қўқон-1912”га қарши учрашувда андижонликлар 1:2 ҳисобида ютқазишди. Аслида ўйин камида дуранг билан тугаши мумкин эди. Аммо Жасур Жалолиддинов пенальтидан фойдалана олмади. Назаровнинг “Андижон” бош мураббийи сифатидаги фаолияти қанча вақт давом этишини вақт кўрсатади. Клуб раҳбари Журъатбек Қувватов эса хорижлик мураббийлар билан музокаралар олиб борилаётганини, аммо Ёрқин Назаровга ҳам ишонч билдирилиши хусусида алоҳида тўхталиб ўтганди.

Энди “Андижон”  клубининг янги раҳбарияти таклиф қилган бош мураббийларга эътибор беринг: Баҳтиёр Ҳамидуллаев, Отабек Ғуломхўжаев ва Ёрқин Назаров! Буларни нима боғлаб турганини биласизми? Барчаси Суперлигада “Андижон” жамоасидаги фаолияти орқали ўз дебютларини ўтказишди. Бунга қадар ҳеч бири ҳали Суперлигада бош мураббий сифатида ишлашмаган. Кўриб турганингиздек, раҳбарият айнан дебютант мутахассисларга имконият ҳавола қилиб келмоқда. Бироқ ҳозирча уларнинг бу ердаги фаолияти узоқ давом этмаяпти. Энди эса навбат Ёрқин Назаровга келди. Қизиқ, бу мураббийни олдинда қандай саргузаштлар кутмоқда?