Англия гранди Мбаппе учун ПСЖ орзу қилган уч юлдузни таклиф қилди

“Челси” хўжайини Тодд Бёли энг машғур юлдузларни трансфер қилишга ишқибоз ҳисобланиши сир эмас. Америкалик бизнесмен ПСЖ ва Килиан Мбаппе атрофида вужудга келган вазиятдан фойдаланиб қолмоқчи.

Express нашрининг маълум қилишича, “Челси” мутасаддилари Мбаппенинг трансферига жамоанинг уч нафар юлдузини қўшиб бермоқчи.

Қизиғи шундаки, таклиф қилинаётган футболчиларга ПСЖ бир неча йилдан бери қизиқиб келаётган эди.

Демак, ПСЖ Мбаппени “Челси”га жўнатса, ўзи орзу қилган уч фуболчига эга бўлади.

Биринчи номзод Ромелу Лукаку. Парижликларга марказий ҳужумчи керак. Бельгиялик форвардга Маурисио Почеттино асосий таркибдан жой бермаслигини таъкидлаган. Демак, бу футболчи ва ПСЖ учун янги вариант.

Иккинчи номзод Раҳим Стерлинг. Ўз даврида Англиянинг энг қиммат футболчиси бўлган Стерлинг катта тажриба эгаси ҳисобланди. Унинг маҳорати парижликларнинг Чемпионлар лигасида ғолиб чиқишига хизмат қилиши мумкин.

Учинчи номзод Ҳаким Зиеш. ПСЖ бу футболчини январь ойида қўлга киритишга жуда яқин келганди. “Челси” вакиллари трансфер ҳужжатларида хатога йўл қўйгани боис бу трансфер амалга ошмай қолганди.

Тодд Бёли ПСЖ хўжайини Нассер Ал-Хелаифий билан дўстона алоқага эга эканини инобатга олган мутахассислар бу трансферни амалга ошириш имкони борлигини таъкидламоқда.