Англия клуби жаҳон чемпионатига кетган футболчини сотиб юборади

«Ньюкасл» ҳужумчиси Ник Вольтемаде ёзда жамоасини ўзгартириши мумкин. Журналист Марк Брус маълумотига кўра, клуб раҳбарияти немис форварди билан хайрлашиш эҳтимолини кўриб чиқмоқда. 

Футболчига бир вақтнинг ўзида бир нечта етакчи жамоалардан қизиқиш бор. Хусусан, унинг хизматларига «Боруссия Дортмунд», «Атлетико Мадрид» ва «Астон Вилла» даъвогарлик қилмоқда.

«Ньюкасл» Вольтемадени сотиш орқали тахминан 65 миллион евро ишлаб олишни режалаштирмоқда. Шу билан бирга, эҳтимолий харидорлар кўпроқ футболчини аввал ижарага олиб, кейинчалик сотиб олиш ҳуқуқи билан келишув тузиш тарафдори.

Ўтган мавсумда Вольтемаде барча мусобақалар доирасида 51 та ўйинда майдонга тушиб, 11 та гол урди ва 5 та голли узатма амалга оширди. 

Айни пайтда тажрибали ҳужумчи Германия миллий терма жамоаси сафида жаҳон чемпионатида иштирок этмоқда.