Англия кубогида кетма-кет 3 мавсумдан буён шу воқеа содир бўлмоқда

“Ливерпуль” кеча Англия кубогининг 1/16 финали доирасида “Брайтон”га қарши баҳс олиб борди ва 1:2 ҳисобида мағлуб бўлди. Шу тариқа мерсисайдликлар мусобақа билан хайрлашди.

Айтиш керакки, Юрген Клопп жамоаси ушбу мусобақанинг амалдаги ғолиби ҳисобланади. Қизиғи, Англия кубогининг амалдаги ғолиби кетма-кет учинчи мавсум 1/16 финалда мусобақадан чиқиб кетмоқда.

2020/2021 йилги мавсумда "Арсенал", 2021/2022 йилги мавсумда эса "Лестер" Англия кубогини худди шу босқичда тарк этган эди.

Эслатиб ўтамиз, ўтган мавсум Англия кубоги финалида "Ливерпуль" "Челси"ни пенальтилар сериясида мағлуб этган ҳолда бош совринни қўлга киритган эди.