Англия нега Франция ёки Аргентина бўла олмайди?

Кеча Англиянинг ўйини кўриб, гап фақат юлдузларда эмаслигини кўпчилик тушуниб етди. Гарчи, уларнинг таркибидаги футболчилар ўта пик формада бўлса ҳам ва юлдузлар ҳар битта позицияда ва ҳатто захирада ҳам тўлиб тошиб ётган бўлса-да, жамоа бу бошқа масала. 

Мисол учун, Франция нимани эвазига Жаҳон чемпионатини ютган ва Англиядан яхшироқ ўйин кўрсатади? Сабаби, бу ерда тезкорлик биринчи планга қўйилади. Асосий таркибнинг ўзида камида 4-5 та "учар тулпорлар" ҳаракат қилади. Бундан ташқари нимага Аргентина сўнгги пайтларда яхши натижалар қайд этяпти? Сабаби, бу термада агрессив футбол, курашувчанлик бор. Умуман олганда, бирор катта турнирни ютмоқчи бўлган терма жамоа маълум бир шаклга кирган ҳолда, ўйнаши талаб этилади. Ҳар бир ўйинга алоҳида ёндашиш ёки юлдузларнинг маҳоратига ишониш бир ойлик турнир учун риск. Битта учрашувда ҳам нимадир ўхшамай қолса, кеч бўлиши мумкин. 

Ҳозирги Англиянинг йўналиши нима ўзи? "Сити" ва "Арсенал" футболчилари майда пасларни қумсаб турган бир пайтда Пикфорд тўпни тепиб юбораверса, Кейн кўпроқ тўп билан муомала қилганда фойдали эканлигини инобатга олсак, уни "скилл"ларидан фойдаланишдан кўра, ҳужумда фақат қанот инструментларидан фойдаланилса, Беллингемнинг "Реал"даги ўйинидан келиб чиқиб, унинг ҳаддан зиёд кўп индивидуал ҳаракатларига "яшил чироқ" ёқилса, терма жамоа ўйинидаги баланс бузилади. 

Балки Пикфордга пас беришни ўргатиш керакдир. Шунингдек, ўзи ҳужумкор футболчиларга бой Англияда Беллингем ва Райсни таянчга қўйиб, "хаос"га бироз барҳам бериб, ҳужум уюштиришда фақат Сакадан эмас, балки Кейннинг креативидан (марказдан ёриб киришга ҳаракат) фойдаланилса, инглизлар яна ҳам хавфли бўлиши мумкин. Бу термада ҳамма юлдуз. Бироқ шуниси аниқки, ҳамманинг индивидидан фойдаланиб бўлмайди. Жамоа бўлиш керак мана шунақа пайтларда. 

Бу шунчаки биринчи ўйин учун хулоса. Балки Саутгейт бизга кейинги беллашувларда бутунлай бошқа Англияни тақдим этар. Ҳозирча уларнинг ўйинида на бир мақсад, услуб ва шижоат кўрмадик. 

Карим Худайқулов