Англияда энг катта маош олаётган футболчилар аниқланди

Франциянинг L’Equipe нашри Англия Премьер-лигасида энг кўп маош олаётган футболчилар ҳақида маълумот чоп этди.

Манбанинг ёзишича, “Манчестер Сити” плеймейкери Кевин де Брюйненинг хизмат ҳақи энг қиммат баҳоланмоқда. Клуб бельгиялик ярим ҳимоячига ҳар ҳафта 425 минг фунт ўтказиб беради.

Иккинчи ўринни Манчестер шаҳри клубларини ҳимоя қилаётган “Сити” ҳужумчиси Эрлинг Холанд ва “Юнайтед” посбони Давид де Хеа бўлишиб туради. Улар ҳар етти кунда 402250 фунтдан маош олмоқда.

Яна икки футболчи – “Ливерпуль” тўпурари Муҳаммад Салоҳ ва “Манчестер Юнайтед” ярим ҳимоячиси Жейдон Санчонинг бир ҳафталик меҳнати 373750 фунтга баҳоланган.

Daily Mail нашрининг таъкидлашича, бонусларни қўшиб ҳисоблаганда Премьер-лига тўпурари Эрлинг Холанднинг даромади энг юқори бўлиб чиқади.