Аниқ чорлов бор: Файзуллаевга Европага кетиш йўлини ўргатишди!

Қатар мезбонлик қилаётган Осиё кубоги олдидан Ўзбекистон миллий терма жамоаси сардори ва энг зўр тўпурари Элдор Шомуродов оғир жароҳат олгани катта йўқотиш сифатида баҳоланган эди.

Мураккаб вазиятда терма жамоага етакчилик қилиш масъулиятини кутилганидек Аббосбек Файзуллаев ўз зиммасига олди. ЦСКА клубида бўлганидек, Аббосбек  терма жамоада ҳам аввалига захира ўйинчиси сифатида Сурия билан бўлган учрашувда майдонга кейинроқ туширилди. Бироқ у қисқа фурсатда жамоамиз ўйинида ижобий ўзгариш қилиб, ўрни асосий таркибда эканини исботлаб қўйди.

Айни пайтда Россия футболи экспертлари Осиё кубогида порлаётган Аббосбек Файзуллаевнинг Европанинг кучли лигаларига ўтиш имкониятини таҳлил қилмоқда.

Sports.uz портали ўзбекистонлик футбол ишқибозлари эътиборига россиялик футбол мутахассисларнинг Файзуллаев ҳақидаги фикр-мулоҳазаларини ҳавола этади.

Дмитрий Хомуха, ЦСКА ва “Зенит” собиқ футболчиси, футбол мураббийи:

Аббосбек Файзуллаев Осиё кубогида ўзини яхши томондан кўрсатмоқда. Одатда, минтақавий мусобақаларда жуда кўп  скаутларт футболчиларни кузатиб боради. ЦСКА яқин орада Европанинг энг кучли чемпионатларидан тўғридан тўғри таклиф олиши даргумон.

Мен Аббосбекка Туркия лигасидан жиддий чорловлар бўлаётганини биламан. Европада топ-даражага кўтарилиш учун аввал кучлироқ чемпионатда маҳоратини намойиш қилиш керак. Туркия Файзуллаев назарга тушиши учун яхши вариант.

Агар нарх ва сифат уйғунлигини инобатга олсак, Файзуллаев жорий мавсумда Россия Премьер-лигасидаги энг зўр трансферлардан бири бўлди. Аббосбек “армиячилар”нинг ўйинига ранг-баранглик ва шиддат олиб кирди. Мана шу нуқтаи назардан Файзуллаев ЦСКА учун катта трансфер бўлди.

Андрей Афанасьев, ЦСКА собиқ футболчиси:

Файзуллаевни ЦСКА учун муваффақиятли трансфер сифатида эътироф этиш керак. Аббос чемпионатнинг биринчи қисмини жуда яхши даражада ўтказди, майдонда ўзини кўрсатди, жамоага катта ёрдам берди ва ўзи ҳам самарали натижалар қайд этди.

Агар Аббосбек мавсумнинг қолган қисмини ҳам шу даражада ўтказса, ЦСКАнинг ҳақиқий етакчисига айланади.  

Жамоа етакчиси бўлиш осон эмас. Бунинг учун мунтазам равишда юқори даражада ўйин кўрсатиш ва жамоани ўз ортидан эргаштириш лозим.

Евгений Бушманов, ЦСКА собиқ футболчиси:

Файзуллаев жуда қобилиятли, истеъдодли ёш йигит. Мавсумнинг биринчи ярмида ЦСКА сафидаги учрашувларда ностантдарт ўйнай олиш қобилиятини кўрсатди. Аббос  ўткир паслар беради, ўзи ҳам гол ура олади.

Энг аввало, Файзуллаев ўйин борасида чўққига чиққан пайтида унинг трансфери учун қанча пул талаб қилишга эътибор қаратиш керак. Ҳозирча, Файзуллаевни энг юқори даражага чиқди ва уни сотиш керак, деган шошилинч қарорларга ўрин йўқ.

Эслатиб ўтамиз, Аббосбек Файзуллаев ЦСКА сафида Премьер-лига ва Россия чемпионатида 18 та учрашувда иккита гол ва тўққизта ассист қайд этди.

Қатардаги Осиё кубогида 20 ёшли футболчимиз тўртта учрашувда ўз ҳисобига иккита гол ва битта ассист ёздириб қўйди.

Марказий Осиёда Элдор Шомуродов даражасидаги футболчи йўқ!

Ирисметов Россия клубларига Ўзбекистон ва Тожикистондан ўйинчи танлаб берди