Анри: "Мен "Барселона"ни яхши кўраман, аммо "Реал"га ҳурмат билдириш керак"

"Арсенал" ва "Барселона"нинг собиқ ҳужумчиси Тьерри Анри Чемпионлар лигаси 1/8 финалида "Реал"нинг "Манчестер Сити" устидан 3:0 ҳисобидаги йирик ғалабасини юқори баҳолади.

"Мен "Барселона"ни яхши кўраман, аммо "Реал"га ҳурмат билдириш керак. Бундай натижани ҳеч ким кутмаганди. Ва Вальверде хет-трик қилади, деб ҳам ҳеч ким ўйламаган. Кимки буни олдиндан билганини айтса — у ёлғон гапиради.

Мен эса жамоавий ўйин ҳақида гапирмоқчиман. Улар айнан шундай ҳаракат билан ғалаба қозонишди. Ҳар бир футболчи бошқаси учун ҳимояланди. Вальверде эса албатта ўз мукофотини олади, чунки у клуб учун ажойиб хизмат қиляпти ва бу ўйинда учта гол урди. Бундай ҳолат у билан жуда кам содир бўлади. Шунинг учун уларга ҳурмат билдириш керак.

Яна бир футболчи ҳақида айтмоқчиман... Мен унинг исмини қандай талаффуз қилишни ҳам билмайман — Питарч... Чунки бугун кечқурун уни жуда диққат билан кузатдим. У қандай ўйин кўрсатди! У ҳамма учун югурди.

Яна бир нарса: мен билмайман, улар бу футболкага нима қўшишган. Ростдан ҳам билмайман. Албатта, бу гапим ҳазил, чунки мен бу футболкани кийишни истамайман. Аммо балки уни кийсам, сочларим ҳам қайта ўсиб чиқар. Улар бу формага нимадир қўшишганга ўхшайди.

“Реал” Чемпионлар лигасида ўйнаганда нимадир бошқача бўлади. Бу футболка гўё оғирдек, чунки сен бу турнир ғолибларига қарши курашасан. Нима учун улар бу формани кийганида футболчилар бошқача кўринишини тушунмайман.

Ҳа, уларга ҳурмат билдириш керак. Чунки биринчи ўйинда "Реал"дан айнан шундай жамоани кутмаган эдим. Шунинг учун буни айтиш мен учун оғир бўлса ҳам, улар жуда яхши ўйнашди", — деди француз мутахассиси.