Анвар Бойназаров франциялик рақибидан реванш олишга қодирми?

Аралаш яккакураш жанг санъатлари устаси ўзбекистонлик Анвар Бойназаров ўзининг навбатдаги жангини бугун Франциянинг Страсбург шаҳрида ўтказади.

Кикбоксинг бўйича “GLORY 64” турнири доирасида 64 кг вазн тоифасида спортчимиз мезбон яккакурашчи Абдуллоҳ Эзбири билан куч синашади. Ушбу жанг Тошкент вақти билан 10 мартга ўтар кечаси (01:00) бўлиб ўтади.

Франциялик спортчи ушбу турнирдаги фаолиятини 2013 йилда бошлаган бўлиб, шу вақтга қадар 5 жанг ўтказиб, 3 ғалаба ва 2 мағлубият қайд этган.

Бўлажак тўқнашув спортчиларнинг ўзаро иккинчи жанги ҳисобланади. Улар 2017 йил 28 октябрида Лионда ташкил қилинган “GLORY 47” турнири тўқнаш келишган ва унда мезбон спортчининг қўли баланд келган эди. Рейтингда Эзбири 2-поғонада бораётган бўлса, Анвар 4-ўринни эгаллаб турибди.

Бойназаров сўнгги марта ўтган йилнинг сентябр ойида рингга кўтарилган. Ўшанда Чикагода ўтказилган "GLORY 58" мусобақасида британиялик Бейли Сугденни нокаутга учратган эди.

Эслатиб ўтамиз, Анвар Бойназаров учун бу “Glory” турнирларидаги 8-жанг ҳисобланади. Бунгача у 7 та жанг ўтказиб, 3 ғалаба (1 нокаут) ва 4 мағлубият қайд этган.

Маълумот учун: “Марказий Осиё шери” номи билан танилган Анвар муай тай билан шуғуллана бошлаган. Кўп йиллар давомида у Таиландда тажрибасини ошириб, ажойиб натижаларга эришган. У биринчилардан бўлиб “энг яхши хорижлик ​​Лумпини жангчиси” деган номга сазовор бўлган. Лумпини муай тай бўйича жаҳоннинг энг номдор стадиони ҳисобланади.

Анвар ушбу камар остида 110 жанг ўтказиб, 88 тасида зафар қучган. 50 тасида эса рақибларини нокаутга учратган. У икки марта “WMY Muay Thai” бўйича жаҳон чемпионига айланган ва бу орада кикбоксинг сир-асрорларини ҳам ўрганиб олади.