АПЛ жамоасидан чемпионат бошланишидан олдин очколар олиб қўйилиши мумкин

«Халл Сити» Чемпионшип плей-оффи финалида «Мидлсбро» устидан ғалаба қозониб, Премьер-лига йўлланмасини қўлга киритди. Бироқ клуб 2026/27 йилги мавсумни очколар камомади билан бошлаб юбориш хавфи остида қолмоқда. Сабаб – лига томонидан жорий этилган фойда ва барқарорлик қоидаларининг бузилиши.

Маълумотларга кўра, клуб 1 июлга қадар тахминан 6 миллион фунтлик молиявий тақчилликни ёпиши шарт. Агар шу муддатгача зарур сумма қопланмаса, «Халл Сити» Премьер-лигага манфий олти очко билан старт олиши мумкин.

Клуб эгаси эгаси Акун Илиджали бу муаммони мухлислар билан «Эм-Кей-Эм Стэдиум»да бўлиб ўтган учрашувда очиқ тан олди.

«Биз режадан ортиқ харажат қилдик ва 1 июлгача бир неча футболчини сотишга мажбурмиз. Мен бундан қўрқмайман, бундан ҳам оғирроқ вазиятларни енгиб ўтганмиз. Энди биз Премьер-лига клубимиз, футболчиларимиз қиймати ошди, бу эса биз учун катта устунлик», — дея Илиджалининг сўзларини BBC Sport келтиради.

Молия бўйича мутахассис Киран Магуайрнинг тушунтиришича, клуб уч йиллик давр учун белгиланган 39 миллион фунтлик йўқотиш лимитини асосан футболчилар шартномаларидаги Премьер-лигага чиқиш бонуслари ортидан ошириб юборган.

Унинг айтишича, бундай бонуслар жамоа бўйича одатда 10–15 миллион фунт атрофида бўлади ва айнан шу тўловлар «клубни бехосдан лимитдан чиқариб юборган».

Маълум қилинишича, клуб Дэвид Акинтола, Абу Камара ва Кайл Палмер бўйича тушадиган таклифларни кўриб чиқишга тайёр. Шу билан бирга, Чемпионшипнинг бир қатор клублари қизиқиш билдирган ҳужумчи Кайл Жозефни сотиш орқали дефицитнинг катта қисмини қоплаш мумкинлиги қайд этилмоқда.

Шу билан бирга, «Халл Сити» етакчи футболчиларини сақлаб қолиш ниятида. Клуб мавсумнинг энг яхши ўйинчиси деб топилган Риган Слейтер ҳамда ёш ҳимоячи Чарли Хьюзга бошқа жамоалардан қизиқиш бўлишига қарамай, уларни сотиш режаси йўқлигини маълум қилган.