АПЛ клуби Гаттузога қизиқиб қолди

"Милан" клуби бош мураббийи Женнаро Гаттузо фаолиятини Англия премьер-лигасида давом эттириши мумкин. Бу ҳақда La Gazzetta dello Sport нашри хабар тарқатмоқда.

Юқоридаги манбаага кўра италиялик мутахассис "Ньюкасл"нинг қизиқишлар доирасига кириб қолган. Гап шундаки, “қарғалар” устози Рафаэль Бенитеснинг клуб билан амалдаги шартномаси ёзда ўз ниҳоясига етади ва у ҳозирча ушбу келишувни узайтиргани йўқ. Шу боис жамоа раҳбарияти испаниялик мутахассис ўрнига муносиб номзод қидирмоқда.

Ўз навбатида Гаттузонинг ҳам “Милан”даги келажаги сўроқ остида турибди. Чунки, агар “россонерилар” мавсум сўнггида Чемпионлар лигаси йўлланмасини қўлга кирита олишмаса, у ўз лавозимидан озод этилади.