“Сити” жамоадоши Рейндерсга гол уриш имконини бермаган Ҳусанов ўйинига муносабат қандай муносабат билдирди?
2026 йилги жаҳон чемпионатининг икки иштирокчиси – Нидерландия ва Ўзбекистон миллий терма жамоалари нуфузли турнирга тайёргарликни ўзаро ўртоқлик учрашуви билан якунлади.
АҚШнинг Нью-Йорк шаҳрида ўтказилган баҳсда пенальтидан киритилган иккита гол нидерландияликларнинг 2:1 ҳисобидаги ғалабаси таъминлади. Ўзбекистонга дуранг натижани ушлаб қолиш учун бир неча дақиқа етмади холос.
“Манчестер Сити” клуби расмий сайти орқали ушбу баҳсда иштирок этган футболчилари – Абдуқодир Ҳусанов ва Тижани Рейндерс ўйинига муносабат билдирди.
- “Манчестер Сити”нинг икки футболчиси – Тижани Рейндерс ва Абдуқодир Ҳусанов жаҳон чемпионати олдидан Нью-Йоркда бўлиб ўтган ўртоқлик учрашувид тўлиқ 90 дақиқа майдонда ҳаракат қилди.
Нидерландия терма жамоаси Манхэттендаги стадионда томошабинларсиз ўтказилган баҳсда Марказий Осиё вакили Ўзбекистонга қарши майдонга тушди. Унда ҳал қилувчи ролни Коди Гакпонинг икки пенальтидан урган голи ўйнади.
13-дақиқада Тижани Рейндерс бош билан берган зарбаси дарвоза ёнидан ўтиб кетди. Орадан кўп ўтмай унинг яна бир зарбаси ҳам нишондан салгина четга чиқди.
32-дақиқада эса Крисенсио Саммервилл жарима майдонида қўполликка учрагач, Нидерландия пенальти ишлаб олди. Коди Гакпо 11 метрли жарима зарбасини аниқ амалга ошириб, ҳисобни очди.
Ўйиннинг сўнгги қисмида нидерландияликлар бир киши кам бўлиб қолишди. Гус Тил қўл билан ўйнагани учун қизил карточка олди.
Қўшимча вақтда ўзбекистонликлар ҳисобни тенглаштиришга муваффақ бўлишди. Игорь Сергеев яқин масофадан аниқ зарба йўллаб, ҳисобни 1:1 кўринишига келтирди.
Бироқ драматик тарзда кечган учрашувнинг сўнгги лаҳзаларида Роналд Куман шогирдлари яна пенальти ишлаб олишди. 97-дақиқада Ян Пол ван Хеккега қарши қоида бузилди ва ҳакам иккинчи марта пенальти белгилади.
Коди Гакпо бу сафар ҳам хатога йўл қўймади ва гол урган ҳолда Нидерландияга ғалаба келтирди.
“Манчестер Сити”нинг яна бир вакили Натан Аке бу баҳсда захира ўриндиғида қолди.
1974, 1978 ва 2010 йилларда Жаҳон чемпионати финалига чиққан Нидерландия терма жамоаси мусобақадаги иштирокини 14 июнь куни Японияга қарши ўйин билан бошлайди.
Абдуқодир Ҳусанов ва унинг ўзбекистонлик жамоадошлари эса тарихда биринчи марта Жаҳон чемпионати финал босқичида иштирок этади. Ўзбекистон терма жамоаси “К” гуруҳидаги биринчи учрашувини 18 июнь куни Колумбияга қарши ўтказади, - деб ёзди mancity.com сайти ходими Нил Ли.
Эслатиб ўтамиз, Абдуқодир Ҳусанов Нидерландияга қарши учрашувда айрим ижобий ҳаракатларни ҳам амалга оширди. У икки марта тўпни олиб қўйди, икки зарбани тўсди. Ўйин охирида эса “Манчестер Сити”даги жамоадоши Тижани Рейндерснинг зарбасини дарвоза чизиғидан чиқариб юборди.
Бироқ шундан кейин Ҳусанов бурчакдан тўп етказиб берилган вазиятда Рустам Ашурматовга қўшиб Ян ван Хеккени итариб юборди ва ўйин охирида ҳал қилувчи пенальтига сабабчи бўлиб қолди.
Статистик ҳисоб-китобларга кўра, Ҳусанов олтита яккакурашдан фақат биттасида ғалаба қозонди. Шунингдек, Абдуқодир тўрт марта қоида бузди. Аслида бу рақам бешта бўлиши ҳам мумкин эди, чунки биринчи бўлим охирида ҳакамлар Ҳусанов жарима майдонида Маленнинг оёқларига ташланганини пайқамай қолишди. Демак, у икки пенальтига сабабчи бўлиши ҳам мумкин эди.
Фикрлар