АҚШга киритилмаган ҳакам УЕФА Суперкубоги ўйинини бошқаради

АҚШга кириши рад этилган сомалилик ҳакам Омар Абдулкадир Артан 2026 йилги УЕФА Суперкубоги учрашувини бошқариши белгиланди. Бу ҳақда Европа футбол ассоциациялари иттифоқи (УЕФА) матбуот хизмати хабар берди.

Суперкубок учун баҳс Чемпионлар лигаси ғолиби франциялик ПСЖ ва Европа лигаси соҳиби инглиз клуби "Астон Вилла" ўртасида 12 август куни Австриянинг Зальцбург шаҳрида ўтказилади.

Артан ўтган ҳафта АҚШга саёҳат қилиш учун виза олган эди. Бироқ у Майами халқаро аэропортига етиб келганида, мамлакатга киришига рухсат берилмади. АҚШ Божхона ва чегара хизмати маълум қилишича, ҳакам қўшимча текширувдан ўтказилган ва ундан сўнг унинг кириши талабларга жавоб бермайди, деган хулоса қилинган. Америкалик расмийлар унга қўйилган аниқ даъволарни ошкор этмади.

Сомали АҚШда амал қилаётган кириш чекловлари қўлланиладиган давлатлар рўйхатига киритилган. Шу билан бирга дипломатлар ва сафарлари АҚШ миллий манфаатларига мос келади, деб баҳоланадиган шахслар учун алоҳида истиснолар назарда тутилган.

Сомали ҳукумати бу воқеа муносабати билан афсус билдирган. Мамлакатдаги футбол ишқибозлари ва жамоатчилик вакиллари эса Артанни қўллаб-қувватлаб, унинг ютуқлари ҳамда Сомалининг халқаро майдонда ижобий қиёфасини шакллантиришга қўшган ҳиссасини алоҳида таъкидлашди.