Арбелоа: "Майдонда режамизни тўлиқ амалга оширдик"

"Реал Мадрид" бош мураббийи Альваро Арбелоа "Реал Сосьедад" устидан 4:1 ҳисобидаги ғалабадан сўнг ўз фикрлари билан ўртоқлашди.

"Ўйин оғир бўлишини билардик, аммо ҳафта давомида жуда яхши тайёргарлик кўрдик ва бу майдонда намоён бўлди. Рақиб агрессив ўйнашини, юқори прессинг қўллашини билардик. Айрим пайтларда чуқурроқ ҳимояга ўтиб, қарши ҳужумларга таянишини ҳам кутгандик. Уларнинг тез қарши ҳужумга чиқишини ҳисобга олган ҳолда, биз рақиб ярим майдонида устунлик қилишни, зарурат туғилганда ҳимояланиш ва прессинг қилишни мақсад қилдик ва буни амалга оширдик.

Биз ҳали ҳам "Бенфика"га қарши аввалги ўйинни эслаймиз ва қандай қийин бўлишини яхши биламиз. Жозе Моуринью жамоалари, хусусан "Бенфика", доимо агрессив бўлади. Шунинг учун жавоб ўйини ҳақида ўйламасдан, энг аввало яхши ўйин кўрсатишга эътибор қаратишимиз керак", – деди Арбелоа клуб телеканалига берган интервьюсида.