Аргентинада Мессининг отаси вафоти ҳақида хабар берган журналист ишдан бўшатилди

Аргентинада машҳур Luzu TV стриминг платформасида дастур олиб борган Флоренсия Пенья ишдан бўшатилди. Бунга унинг терма жамоа ҳужумчиси Лионель Мессининг отаси Хорхе Месси вафот этгани ҳақида асоссиз хабар тарқатгани сабаб бўлди. Бу ҳақда Infobae нашри маълум қилди. Журналист дастлаб Хорхе Мессининг ўлими ҳақида айтган, бироз вақт ўтиб эса бу маълумот ёлғон эканини тан олган. Маълумотга кўра, Пенья содир бўлган воқеа учун Лионель Мессидан очиқ кечирим сўраган.

Эслатиб ўтамиз, 2026 йилги жаҳон чемпионати АҚШ, Мексика ва Канада ҳудудида ўтказилмоқда. Мусобақа 11 июнда старт олган бўлиб, 19 июлда якунланиши режалаштирилган. Амалдаги жаҳон чемпиони — Аргентина терма жамоаси. У 2022 йилда Қатарда бўлиб ўтган финалда Франция терма жамоасини пенальтилар сериясида мағлуб этган эди.