"Арсенал" чемпионлик парадида тарихий рекорд қайд этди

Лондоннинг шимолий қисмида "Арсенал"нинг Англия Премьер-лигасидаги чемпионлигига бағишланган тантанали парад бўлиб ўтди.

Маълумотларга кўра, байрам тадбирига 1,5 миллионга яқин мухлис ташриф буюрган. Бу эса Англия футболи тарихидаги чемпионлик парадлари орасидаги рекорд кўрсаткич ҳисобланади.

22 йиллик танаффусдан сўнг Англия чемпионига айланган "канонирлар" АПЛ кубогини очиқ томли автобусларда мухлисларга намойиш қилди.

Тантаналар янада кўтаринки руҳда ўтиши мумкин эди, аммо бир кун аввал Микель Артета шогирдлари Чемпионлар лигаси финалида ПСЖга пенальтилар сериясида мағлуб бўлганди.

Шунга қарамай, "Арсенал" мухлислари ўз жамоасининг узоқ кутилган чемпионлигини катта шоду-хуррамлик билан нишонлади.