"Арсенал" Дьёкереш трансфери бўйича расмий таклиф юборди

Лондоннинг "Арсенал" клуби "Спортинг" ҳужумчиси Виктор Дьёкереш учун расмий трансфер таклифини юборди. "Record" нашрининг хабар беришича, таклиф қиймати 55 миллион евролик кафолатланган тўлов ва қўшимча 10 миллион евро бонуслардан иборат.

Шу билан бирга, "Спортинг" президенти Фредерико Варандас аввалроқ билдирганидек, клуб 60+10 миллион евролик таклифга ҳам ҳужумчини сотиш ниятида эмас. Аммо футболчининг агенти ва ўзининг таъкидлашича, раҳбарият аввалроқ бу миқдордаги таклиф келиб тушса, трансферга рози бўлишга ваъда берган.

Швециялик 27 ёшли Дьёкереш жорий мавсум жамоа сафида 52 та ўйин ўтказиб, 54 та гол ва 13 та ассист қайд этган. Унинг клуб билан шартномаси 2028 йил июнигача амал қилади.