“Арсенал” қимматга олган юлдузидан воз кечди

Англия премьер-лигасида чемпионлик учун курашаётган “Арсенал” жорий мавсумдан кейин таркибда жиддий ўзгаришлар қилишни режалаштириб қўйди.

“Канонирлар” яқинлашиб келаётган ёзги трансферлар ойнаси даврида 27 ёшли форвард Виктор Дьёкереш трансфери бўйича ҳар қандай таклифларни кўриб чиқишга тайёрлигини билдирди.

Бу ҳақда Indykaila News аккаунти X ижтимоий тармоғидаги саҳифасида хабар бермоқда.

Лондон клуби швед ҳужумчисини 2025 йилнинг ёзида “Спортинг”дан 70 миллион еврога сотиб олган эди. Шу вақт мобайнида Дьёкереш барча мусобақаларда 48 та ўйинда иштирок этиб, 18 та гол ва иккита голли узатмани амалга оширди.

Футболчининг клуб билан амалдаги меҳнат шартномаси 2030 йил ёзигача мўлжалланган. Transfermarkt портали маълумотига кўра, футболчининг бозор қиймати 65 миллион еврони ташкил қилади.