"Арсенал" Томиясу билан шартномани узайтирмоқчи

Лондоннинг "Арсенал" клуби ҳимоячиси Такэхиро Томиясу амалдаги шартномасини узайтириш бўйича таклиф олди.

Инсайдер Фабрицио Романонинг хабар беришича, япониялик футболчи янги шартнома шартларидан қониқиш ҳосил қилган. У "канонирлар"нинг таклифига рози бўлди. Тез орада келишув расман эълон қилинади. Томонлар ўртасидаги янги шартнома иш ҳақи оширилган ҳолда узоқ муддатга тузилади.

25 ёшли осиёлик футболчи 2021 йилдан буён "Арсенал"да ўйнаб келмоқда. Томиясунинг инглиз клуби билан амалдаги шартномаси 2025 йилнинг ёзига қадар тузилган.