Аспиналл: "Павлович билан жангдан олдин қўрқув ҳис қилмоқдаман!"

Том Аспиналл Сергей Павловичнинг зарба кучи уни чўчитишини тан олди.
Оғир вазнда вақтинчалик чемпионлик камари учун октагонга кўтариладиган Том Аспиналл (13-3) ушбу жангдаги рақиби россиялик Сергей Павловичнинг (18-1) таланти ҳақида тўхталиб ўтди:
"Ишонасизми, қаршимдаги бу азаматни кўришим ҳамоноқ танамда қўрқув сезмоқдаман. Павлович қўрқинчли жангчи. Ундан эҳтимолий хавфни кутмаслик учун аҳмоқ бўлиш керак. Лекин, мен босим ва қўрқув ҳолатида ўзимни комфорт ҳис қиламан. Шундагина менда ҳаммаси ажойиб тарзда ўхшайди.
Қўрқув билан муносабатларимиз аъло. У менга суперкуч бера олади. Қўпол қилиб тушунтирсам, қанчалик қўрқсам, шунчалик яхшироқ жанг қиламан."