Асрор Алиқулов: "Иккинчи бўлимда айрим асосий ўйинчиларни туширдик ва иккита тўп киритдик"

Ўзбекистон Кубоги доирасидаги “Машъал” – “Олимпик” (2:1) учрашувидан сўнг мезбонлар бош мураббийи Асрор Алиқулов қуйидагича фикр билдирди.

"Кубок ўйинига U21 жамоасидан кўпроқ футболчиларни жалб қилдик. Лекин, барибир улар икки кун олдин ўз чемпионатидаги ўйинни ўтказишганди. Шу боис йигитларни ҳали тиклана олмаганликлари сезилиб қолди. Биринчи бўлимда ўйинга қийин киришишди.

Ҳисобда ортда бордик. Иккинчи бўлимда айрим асосий таркиб футболчиларидан туширдик. Кейин устунлик қила бошладик. Иккита тўп киритдик. Учрашув охирларида Дилшод Раҳматуллаевни захирага олдик, ёш ўйинчиларга имконият бердик. “Машъал” жамоасини кейинги босқичга чиққани билан ҳаммани табриклайман".