Asror Aliqulov: "Pro liganing hozirgi tezligiga sekinlik qilyapmiz"

Про лиганинг навбатдаги турида “Шўртан” ўз уйида Фарғонанинг ФАРДУ жамоасини қабул қилди. Сўнгги сонияда ғузорликлар аламли голни ўтказиб юбориб, тайёр ғалабадан қуруқ қолдилар ва учрашув 2:2 ҳисобида якунланди.

Учрашувдан сўнг “Шўртан” бош мураббийи Асрор Алиқулов матбуот анжуманида қатнашди.

- Ўйин оғир ўтишини, ФАРДУ жамоасини стандартлардан фойдаланишини, босим қилишини билардик. Лекин футболчилар енгил ўйин бўлади, деб ўйлаган бўлиши мумкин. Ҳисобда олдинда бордик. Стандартдан гол ўтказиб юбордик. Кейин яна ҳисобда олдинга чиқдик. Аммо охирги сонияда ғалабани қўлдан бой бердик. Кераксиз жойларда қўполлик бўлди ва жарима зарбасидан бизни жазолашди.

- Охирги голга муносабатингиз қандай бўлди? Жуда чиройли гол бўлдими ёки жонли девор қўйишда хатолик бўлиб, дарвозабон ҳам хатога йўл қўйдими?

- Тўп жонли деворнинг ёнидан ўтди, чунки паст траекторияда йўлланди. Яна кўриб чиқамиз. Захирадан майдонга тушган футболчилар ўйинни кучайтира олмадилар. Вазият бўлди, фойдалана олишмади. Киришиб кетишда жисмоний қийинчиликка учрадилар. Шу боис куч топа олмадилар. Охирида улар узун паслар билан ўйнадилар. Захирамиз бу учрашувга мос тушмади.

- “Шўртан”да ФАРДУга нисбатан тажрибали футболчилар бор. Ўйиндан келиб чиқсак, аламли тарздаги дуранг бўлмадими?

- Охирги сонияларда гол ўтказиб юбориш аламли. Футболчиларни хатолари...ФАРДУ жамоасида ўйинчилар майдонда кўп ҳаракатланади. Биз кўпинча қўллаб-қувватлашда, тўп билан ўйнашда секинлик қилдик. Улар биздан тезроқ эди. Лекин қайсидир ҳолатларда уларни жазолаш керак бўлган пайтда ҳам гол ура олмадик. Ўйин охирида легионеримиз 2-3 метр масофадан очиқ қолган дарвозага гол ура олмади. Агар гол урганида жамоа охирги дақиқаларни асабий тарзда ўтказмасди. Узун паслардаги курашларда ҳимоячиларимиз ҳам хатоликка йўл қўйди.

- “Шўртан” иккинчи голни урганидан кейин иккита ўзгаришни амалга оширдингиз. Голдан кейин қайсидир вазиятни ўзгартирмоқчи бўлдингизми?

- Кўпинча марказда қийинчиликка дуч келяпмиз. Бу позицияда тезкорроқ ўйинчи етишмаяпти. Бу борада қийналдик. 5 та ҳимоячига ўтдик ва рақибни ҳужумлари анча камайди. Барибир охирги сонияда жарима зарбасидан тўп ўтказиб юбордик.

- “Шўртан” тезкор жамоаларга қарши тезкор ўйнарди, очиқ ўйнайдиган рақиблар билан очиқ ўйнарди. Бироқ чемпионат бошланганидан бери ҳеч қайси жамоага қарши “Шўртан”да тезкорлик кўрсатилмаяпти. Буни қандай баҳолайсиз?

- Шу фикрни ўзим айтдим. Бизга марказда тезкор ўйинчилар етишмаяпти. Ҳимоядан ҳужумга чиқиш жараёни секин. Бизда фақат қанотларда тезкор ўйинчиларимиз бор. Тезкорроқлиги учун Сувоновни асосий таркибга қўйгандик. Ўйлайманки, у ёмон ҳаракат қилмади. Рақиблардан келиб чиқиб, кейинги ўйинга кимларни қўямиз? Тўғри айтяпсиз, секинлик билан ўйнаяпмиз. Фақатгина Колочков, Тошқўзиев орқали узун паслар билан тез ҳужумлар қиляпмиз, бироқ ўртада футболчиларимиз секин ҳаракат қилишяпти.

- Тезкорликдан ташқари тўп узатишларда ҳам оқсоқликлар кузатиляпти...

- Айтганимдек, футболчилар бу учрашувга енгил қарашдими, оддий ҳолатларда рақиб босим уюштиряпти. Машғулотларда ҳам шунга эътибор қиламиз. Ёш жамоалар кўп. Айрим ўйинчилар ҳали бунақа футболга тайёр эмасдек бўлиши мумкин. Лекин бу сўзни айтмоқчи эмасдим. Фақат бу ўйиндан келиб чиқиб айтяпман, секин ўйнаганимиз учун. Про лигада футболчилар ўйнагани беришмайди, Суперлигада сал бошқачароқ. Про лигада кўряпсиз, босим бор ва биз про лиганинг ҳозирги тезлигига секинлик қиляпмиз.