Асрор Алиқулов "Қизилқум"ни бошқарадими? Мураббий қандай жавоб берди?

Ғузорнинг “Шўртан” клубини бир неча мавсум давомида бошқарган қашқадарёлик мураббий Асрор Алиқуловнинг шартномаси шу йилнинг декабрь ойида якунига етади.

Жамоаси билан Про лигада 6-ўринни эгаллаган Асрор Чориевичнинг хизматига айрим клублар томонидан қизиқишлар бўлаётгани маълум бўлди.

Мисол учун Навоийнинг “Қизилқум” жамоаси Алиқуловга таклиф билан чиққанлиги ҳақидаги хабарлар қулоғимизга чалинаётганди. Бунга ойдинлик киритиш учун Асрор Алиқулов билан боғланганимида мураббий Sports.uz сайтига шундай деди:

"Ҳа, менинг шартномам декабрь ойи охирида тугайди. Таклифларга келсак, ҳозирча бу оғзаки гап холос. Жиддий тарзда ҳали ҳеч нарса бўлгани йўқ. Ҳаммасини ўйлаб турибман. Нима бўлишини вақт кўрсатади", - деди Алиқулов.

Эслатиб ўтамиз, жорий чемпионатда "Қизилқум"га устозлик қилган сербиялик Никола Лазаревич жамоани тарк этишини эълон қилиб улгурган.