"Атлетико" "Барса"дан янги йил совғасини қабул қилиб олди

Ла Лиганинг 18-турида "Атлетико" "Барселона" меҳмони бўлиб, ажойиб ғалабани қўлга киритди. Дастлаб, Педри ҳисобни очди, Де Пауль эса жавоб қайтарди, сўнгги дақиқалар ўтиб бораётган бир пайтда Сёрлот жамоасини олдинга олиб чиқди. 

Бу учрашувда каталонияликлар катта устунлик билан ўйнади, лекин 3 очко "матрасчилар"га насиб қилди. Флик шогирдлари дарвоза томон 19 та зарба берган бўлса, Мадрид клуби 5 маротаба Пенья дарвозасини безовта қилишди, улардан 4 таси аниқ. Шу билан бирга, "Атлетико"нинг xG'иси битта голга ҳам етгани йўқ. "Барселона"да эса бу кўрсаткич 2.54 эди. 

Ўйиндан кейин меҳмонлар бош мураббий Симеоне "Барса" ғалабага лойиқ ҳаракат қилди, лекин бу футбол", деди. 

Бу жамоа учун тарихий ғалаба. Сабаби, клуб сўнгги марта "кўк-анорранглилар"ни меҳмонда 2006 йилдан кейин илк бора таслим қилди. Аргентиналик мураббий учун эса бу биринчиси ҳисобланади. 2006 йилда бўлиб ўтган учрашувда Торрес дубль, Родригес эса битта гол уришга муваффақ бўлганди. Шунингдек, Ларсон жавоб қайтарган. (3:1).

Симеоне шогирдлари барча чемпионатларда кетма-кет 12-ғалабасини қўлга киритди. Сўнгги марта клуб 27 октябрда "Реал Бетис"га мағлуб бўлган. Шундан бери жамоа барча беллашувларни ютди ва Ла Лигада биринчи ўринга чиқиб олди. 

Бу турда "Реал" "Севилья"ни ўз майдонида қабул қилади. "қаймоқранглилар" ғалабани қўлга киритган тақдирда ҳам, қўшнисидан ўтиб кета олмайди. Сабаби, пешқадамнинг ҳисобида 41 очко мавжуд. Шундай қилиб, "Атлетико" 2024 йилни Ла Лига биринчи ўринда якунламоқда.

"Атлетико" мавсумни ёмон бошлаганди. Айниқса, Чемпионлар лигасида ишлар яхши эмасди. Жамоа "Лилл" ва "Бенфика"га қарши ўйинларда жами 7 та гол ўтказиб юборганди. Аммо улар қайтишга муваффақ бўлишди. Бу йўлда ПСЖ ва "Барса" мағлуб этилди. "Спарта Прага"га 7 та, "Реал Вальядолид"га жавобсиз 5 та гол урган мадридликлар "Севилья"га қарши драмага айланиб кетган баҳсда ҳам ғалабани илиб кетишганди.

Эслатиб ўтамиз, "Атлетико" бу мавсум "Реал" билан тўқнаш келди ва дурангга имзо чеккан. Ўшанда Корреа сўнгги дақиқаларда гол уриб кетганди.