"Атлетико" Ҳулиан Альваресни сотиши мумкин — катта қайта қурилиш режаси тайёрланмоқда

Мадриднинг "Атлетико" клуби ёзги трансфер ойнасида ҳужумчи Ҳулиан Альваресни сотиш имконини кўриб чиқмоқда. Бу ҳақда AS нашри хабар берди.

Манбага кўра, клубнинг спорт директори Матеу Алемани жамоани янгилашга қаратилган катта трансфер кампаниясини бошлаган. Бу "Атлетико"нинг сўнгги йиллардаги энг йирик қайта қурилиши бўлиши мумкин.

Жамоа Ла Лига мавсумини 4-ўринда якунлади ва Чемпионлар Лигасида ярим финалгача етиб борди. Мавсумнинг энг оғриқли натижаси эса "Вильярреал"га қарши 1:5 ҳисобидаги мағлубият бўлди.

Альварес 2024 йилда 75 миллион евро эвазига клубга келган ва дастлаб янги лойиҳанинг асосий футболчиси сифатида кўрилган эди. У "Атлетико" сафида 106 ўйинда 49 та гол урди, жорий мавсумда эса 20 та гол билан ажралиб турди. Бироқ ҳалигача клуб билан бирорта соврин қўлга киритмаган.

Футболчига ПСЖ, "Барселона" ва "Арсенал" клублари қизиқиш билдирмоқда. Мадрид клуби эса унинг учун камида 100 миллион евро талаб қилмоқчи.

Трансфердан тушадиган маблағлар эвазига жамоа "Манчестер Сити"дан кетиши мумкин бўлган Бернарду Силва ва "Тоттенxэм" ҳимоячиси Кристиан Ромеро билан шартнома имзолашни режалаштирмоқда. Шунингдек, клуб мақсадларидан Жоау Гомеш ва Марк Кукурелла ҳам ўрин олган.