Bahrom Haydarov: "Biz uchun har bir o‘yin finalga teng"

“Surxon” klubi bu turda Olmaliqda AGMK jamoasiga qarshi uchrashuvda yagona gol evaziga mag‘lubiyatga uchradi. O‘yindan keyin termizliklar bosh murabbiyi Bahrom Haydarov mag‘lubiyat sabablari haqida gapirdi.

- O‘yin haqida fikr bildiradigan bo‘lsam, birinchi bo‘limning dastlabki daqiqalarida AGMK qator xavfli hujumlarni tashkil qildi. Darvozabonimizning ishonchli o‘yinlari sabab ko‘plab vaziyatlar golga aylanmadi. Taym o‘rtalarida esa yigitlar o‘zlariga kelib olishdi va maydonda erkin harakat qila boshladi.

Ikkinchi bo‘limda ham yomon harakat qilmadik. Afsuski, himoyadagi xato tufayli gol o‘tkazib yubordik. O‘tkazib yuborilgan goldan so‘ng, yigitlarimizda bir qator imkoniyatlar yuzaga keldi. Lekin zarbalarimizga aniqlik etishmadi. Ortga yo‘l yo‘q. O‘z ustimizda ishlashda davom etamiz. Biz uchun har bir bahs finalga teng. Buni hammamiz yaxshi his qilib turibmiz. Ertadan "Navbahor" bilan o‘yinga tayyorgarlikni boshlaymiz.

“Surxon” matbuot xizmati.