Баҳром Ҳайдаров: "Қанийди, шунга ўхшаш футболчиларимиз кўпроқ бўлса?!

Про лиганинг 18-турида “Қўқон-1912” “Хоразм”га қарши майдонга тушди. Қизиқарли кечган ўйинда қўқонликлар 1:0 ҳисобида ғалаба қозониб, ўз ҳисобига 3 очко ёздириб қўйди.

Учрашувдан кейин “Қўқон-1912” бош мураббийи Баҳром Ҳайдаров фикрлари билан ўртоқлашди.

- Биринчидан, ишқибозларни, раҳбариятни ва футболчиларни бугунги ғалаба билан табриклайман. Учрашув жуда оғир ўтди. Гувоҳи бўлдинглар, “Хоразм” биринчи даврадаги “Хоразм”дан анча фарқ қиляпти. Ўтган турда “Бухоро”га 3:1 ҳисобида ютқазган бўлса ҳам 10 киши бўлиб 1:1 ҳисобини сақлаб келаётганди. Жамоада яхши тарафга ўзгаришлар бор. Омадимиз келиб, гол уриб олганимиз бизга ғалаба келтирди. Ўйлайманки, бугунги учрашувдан бўшашмасдан кейинги баҳсларга яхши тайёргарлик кўришимизга туртки бўлади.

- Дониёр Исмоилов ва Зокиржонов кейинги пайтларда кўриниш беришмаяпти?

- Исмоиловни соғлигида озгина муаммо бор. Аввал оёғидан жароҳат олди. Кейин бироз шамоллаб қолди. Ҳозир даволаняпти. Зокиржонов позицияда қийин бўляпти. У ҳозир руҳий томондан тайёр эмас. Кейинги учрашувларга аста-секин қўшиб борамиз. Ундан умидимиз катта. Келажаги порлоқ. Уни бежизга олиб юрганимиз йўқ.

- Суннатилла Поёнов ҳимояда ҳам, ҳужумда ҳам фаол тўп суряпти. У ҳақида фикрингиз?

- Поёновни чап ҳимояси учун олганмиз. “Пахтакор” ўринбосарларида шу позицияда тўп сурарди. Уни ўртоқлик учрашувларида бошқа позицияларда текшириб кўрганимизда ўзини яхши томондан кўрсата олди. Қанийди, шунга ўхшаш футболчиларимиз кўпроқ бўлса?! Бир қатор позицияда ўйнай оладиган ўйинчига эгамиз. Ўнг қанотда ҳам, инсайд бўлиб ҳам ўйнай олади. Шу боис Поёновдан хоҳлаган жойимиздан фойдаланишимиз мумкин.