Bahrom Haydarov: "Qizilqum" saviyali klub, hozirgi o‘rni o‘ziga mos emas"

Bugun Superliganing 10-tur bellashuvlariga start berildi. Navoiyda “Qizilqum” klubi Termizning “Surxon” jamoasini qabul qildi va uchrashuvda 1:1 hisobi qayd etildi.

Bu natija mezbonlardan ko‘ra, ko‘proq mehmonlarni qoniqtirgandek bo‘ldi. Buni o‘yindan keyin “Surxon” murabbiyi Bahrom Haydarovning sports.uzga bildirgan fikrlaridan ham bilsa bo‘ladi.

- Har bir ochko biz uchun oltinga teng. Safarda qo‘lga kiritilgan bir ochkoga ham Xudoga shukr qilishimiz kerak. “Qizilqum” hisobni tenglashtirganidan keyin yana ikki-uchta qulay imkoniyatga ega bo‘lgandi. Ularni golga aylantirganida yutib ketishi ham mumkin edi. Ammo shu bilan birga bizda ham g‘olib chiqish imkoniyatimiz bor edi. Boisi, jamoamiz yutayotgan mahalda ayrim vaziyatlarga ega bo‘ldik. Lekin mana shunday paytlarda futbolchilarga biroz mahorat etishmay qolyapti. Tarkibdagi ayrim yigitlarda jarohatlar borligi uchun zaxiramizdan yoshlarni tushirdik. Biroq ular o‘yinimizni kuchaytira olmadilar, natijada charchab qoldik. Shunday bo‘lsa ham qayd etilgan hisob adolatli bo‘ldi.

- Natijadan kelib chiqsak, “Surxon” bir ochkoni qo‘lga kiritdimi yoki...

- Agar ikkala bo‘limlar boshidagi o‘yinimizni hisobga olsak, bir ochkoni yaxshi desak bo‘ladi. Bo‘lim o‘rtalaridagi o‘yinimizni boshidan oxirigacha ko‘rsatganimizda uch ochko olib ketsak bo‘lardi.

- Kimga e’tirozingiz bor?

- Hech kimga e’tirozim yo‘q. Hammasi mehnat qilishdi, oxirigacha kurashishdi.

- “Qizilqum”ning o‘yiniga fikringiz qanday?

- “Qizilqum” jamoasida mahoratli o‘yinchilar yig‘ilgan. Bu klubga qarshi o‘ynash qiyin bo‘ldi. Agar ularga qarshi yaqin o‘ynamasak va bo‘sh hududlarni qoldirsak, mahoratli o‘yinchilari jazolashlari mumkin. Bu saviyali klub. Hozirgi o‘rni o‘ziga mos emas.