"Barsa" bir futbolchini narxi oshmasidan transferga ko'ndirdi

«Barselona» mutasaddilari «Rasing» klubi himoyachisi Xorxe Salinas transferi bo‘yicha kelishuvga erishdi. Bu haqida sport.es nashri xabar berdi.

Manba ma’lumotiga ko‘ra, 19 yoshli futbolchi 30 iyungacha kataloniyaliklar bilan shartnoma imzolaydi va kelasi mavsum uchun asosiy jamoa ro‘yxatiga kiritiladi.

Salinas joriy mavsumda «Rasing» tarkibida o‘zini yaxshi tomondan ko‘rsatdi: u Segundada 33 o‘yin o‘tkazib, yetti marta golli uzatma muallifiga aylandi. Shu orqali Ispaniya va Angliyaning bir qator klublari e’tiborini tortdi.

Muzokaralarda hal qiluvchi omil sifatida futbolchining o‘zi «blaugrana» safida to‘p surish istagi, shuningdek, uning agenti Jorje Mendesning faoliyati qayd etilmoqda. Kelishuv yaqin kunlarda rasmiy yopilishi kutilmoqda.

Xabarga ko‘ra, «Rasing» futbolchining shartnomasidagi to‘lov miqdorini 8 million yevro atrofida baholamoqda. «Barselona» esa summani kamaytirish maqsadida kelishuvga o‘z akademiyasi yoki zahira jamoasidan bir futbolchini qo‘shib berish variantini ko‘rib chiqmoqda.

1 iyuldan boshlab Salinas uchun belgilangan to‘lov miqdori 16 million yevrogacha oshishi mumkin. Shu bois kataloniyaliklar transferni ushbu muddatgacha yakunlashga intilayotgani aytilmoqda.