"Барса" футболчиси хизматига "Манчестер Юнайтед" ва "Арсенал" қизиқиш билдирмоқда

"Барселона" ҳимоячиси Рональд Араухо фаолиятини Англия Премьер-лигасида давом эттириши мумкин.

Хабарларга кўра, 23 ёшли футболчига "Манчестер Юнайтед" ва "Арсенал"дан қизиқиш бор. Қайд этилишича, "қизил иблислар" уругвайлик истеъдод соҳибига 8, "канонирлар" эса 6 миллион евро маош кўзда тутилган шартнома таклиф қилмоқда.

Унинг каталонияликлар билан амалдаги шартномаси 2023 йилнинг ёзида якунига етади. Унинг трансфери 35 миллион еврога баҳоланмоқда.

Араухо "кўк-анорранглилар" шарафини 2018 йилдан бери ҳимоя қилиб келади. Бу вақт оралиғида у асосий жамоа сафида 70 учрашувда майдонга тушиб, ўз ҳисобига 5 гол ва 1 ассистни ёздириб қўйишга муваффақ бўлган.