“Барса” кўп гол ураётган ҳужумчисини сотиб юборади

Испания чемпионатида пешқадамлик қилаётган “Барселона” ҳужумчиси Ферран Торрес катта эҳтимол билан ёзги трансфер ойнасида сотиб юборилади.

Каталония клуби, аввал ҳам хабар қилинганидек, Роберт Левандовски билан шартномани узайтиришни режалаштирмоқда.

Польшалик футболчиси клубда қолиш учун захира ўйинчиси мақомини олишга рози, асосий ҳужумчи вазифасига бошқа форвард таклиф этилади.

“Барселона” раҳбарияти уч нафар ҳужумчига эҳтиёж йўқ, деб ҳисобланмоқда, шунинг учун Торрес сотувга қўйилади.

Sport нашрининг ёзишича, клуб раҳбарияти якуний қарорни яқин ҳафталар ичида қабул қилади.

Ферран Торрес жорий мавсумда барча турнирларда 40 та учрашувда 16 та гол урган ва “Барса”нинг асосий тўпурарларидан бири ҳисобланади. Бироқ у январь охиридан буён “кўк-анорранглилар” сафида гол урмаяпти, бу эса унга барқарорлик етишмаётганидан далолат беради.

Transfermarkt портали экспертлари баҳосига кўра, 26 ёшли ҳужумчининг футболчининг бозор қиймати 50 миллион еврони ташкил қилади.