“Барса” Левандовски ўрнига кўп гол урадиган юлдузни олиб келмоқчи

“Барселона”нинг асосий тўпурари Роберт Левандовски тез орада 37 ёшни қаршилайди. Каталонияликлар ҳозирдан унга муносиб ўринбосар қидирмоқда.

Ханс Дитер Флик ҳужум чизиғини А Серия тўпурари Лаутаро Мартинес бошқаришини истаяпти. Каталонияликлар қимматбаҳо трансферни келаси ёз амалга оширишни мўлжаллаяпти.

27 ёшли аргентиналик ҳужумчи Европанинг энг барқарор тўпураридан бири ҳисобланади. 2018 йили “Интер”га келганидан бери мунтазам гол уриш қобилиятини намойиш қилиб келмоқда.

Қизиғи шундаки, “Барселона” 2020 йили ҳам Лаутаро Мартинесни ўз сафига қўшиб олишга ҳаракат қилган эди. Бироқ ўшанда Мартинес жамоада қолишни маъқул кўрган. Ҳозир ҳам “Интер”га сардорлик қилаётган жаҳон чемпионининг Каталония ёки бошқа гранд клубга ўтиш истагини акс эттирган бирорта хабар йўқ.